【迷】秘書王何綺雲硬食白眼侮辱：匿埋喊好平常！
被網友稱為「御用秘書」的何綺雲，最近在新劇《迷》終於唔駛做秘書，飾演差婆Nat哥，做鄭嘉穎上司，同下屬關係好，又識走精面，但現實中的她剛好相反，不善於交際。她今日出席《迷》宣傳活動接受《香港01》訪問時，她說：「我性格完全唔適合呢行，唔識social，唔講嘢，唔識講嘢，唔係好敢同人打招呼……咁樣機會當然唔多啦，係呢行我要好辛苦先食到一啖飯嘅人，但我好有火，如果唔係我唔會留喺呢到，我唔係好爭取，但裏面又好想，如果有機會的話，我會好努力去做，我唔會令畀機會我嘅人失望，如果唔係我彌補唔到我待人處事嘅失敗。」
不擅交際唔埋堆 感激王心慰鼓勵
不是性格巨星扮cool，何綺雲由細到大都不懂交際，她說：「我細個喺街撞到屋企人，我會掉頭走，唔係因為我唔鍾意佢，而係我唔知點做。（係咪有社交障礙？）我諗係啩，但𠵱家好咗好多，我係拍完嘢就走嘅人，唔識social，拍嘢放食飯，如果唔係同事拉住一齊食，我會匿埋自己一個，大家話我係王心慰Amy御用，其實我哋只係工作上溝通，我哋唔會成日傾電話，講親都係公事無其他，但我好多謝佢，每次當我想放棄，Amy就畀個好玩嘅角色我，令我想繼續落去，同佢關係我會覺得大家在心中。」
何綺雲入行前為Starz People model，26歲入行，後來加入TVB讀第17期訓練班，同期有鄭世豪、李霖恩等，捱了14年先有個好角色，但之前多做秘書角色，她說：「我諗我有10年冇拍過古裝，做咗幾多次秘書？多到我都唔記得，但我未做過秘書，文職我就做過，亦可能我以前做得多，大家先留意到我今次唔使做，一個演員當然唔想被定型啦，咁但係有人記得亦係好事。」
今次不用飾演秘書，連網友都替她高興，但何綺雲不敢上討論區，怕自信心再受損，她說：「我𠵱家唔敢上討論區，你話我知有人留意到我，我真係好開心，但我自信心已經跌到去底點，我直頭睇返自己演出都覺得唔順眼。我以前做model好有信心，但我嚟到呢到（TVB），我冇哂，我冇嘢back up，實則上或者關係上，記得喺《與敵同行》嗰陣，我上過去討論區睇，但發現俾人鬧到我一文不值，當時我以為自己演藝生涯玩完喇，好彩珍姐安排咗我去拍處境劇，等我慢慢嚟過。」
入行14年有目標：我唔介意等十幾年
何綺雲當模特兒時，收入不俗，月入平均三萬，但在電視台初時月入5千以下，最令她辛苦的不是收入，而是不穩定的際遇，她說：「我對錢銀唔敏感，多有多洗，少有少洗，唔開心匿埋喺屋企喊，喊過好多次，我只係試過一次拍緊嘢時候喊，但你唔好問我係邊一次，我唔想提到任何人，我相信唔止我一個藝員會係咁，我哋呢類藝員匿埋喊係好平常。俾人白眼、侮辱，由唔開心變到冇感覺，叫你做阿喂，阿邊個邊個埋位，聽到冇反應喇，做啦，唔好諗喇，但我覺得用心做嘢會有人睇到㗎，有人可能要一年、兩年先得到，可能我要等十幾年囉，但如果要十幾年先達到目標，我唔介意。」