【有樓萬事足．有片】50蚊男現真身　稱無綫扭曲原意：鬥出位咁

《有樓萬事足》有極慳「50蚊男」岑先生出場，同大家分享如何慳錢慳到盡，為慳水費到球場浴室沖涼、為節省車錢而行路返工，又叫大家找個願意不花錢的女朋友。不過，節目出街之後，岑先生坦言效果與他想像有落差：「當初TVB搵我，就話想我講下慳錢方法，但個節目出街就叫《有樓萬事足》，就好似唔係當初嗰樣嘢咁。」對於原意被扭曲，岑生沒有憤怒，只得無奈，「冇唔會後悔嘅，但都會有啲失望，因為講唔到我個重點。」他明白電視台有時候為求收視，就會有剪接效果，但沒想到同一個節目其他受訪者會如此語出驚人：「訪問個時得我一個，我唔知㗎嘛，之後我先發覺，原來咁堅㗎？變咗好似去咗第二個方向咁囉，即係大家好似鬥出位咁。」

之後岑先生就話自己真正慳錢方法跟電視台所呈現的故事有所出入：「其實我讀大學最尾兩年就開始慳錢大計，嗰8年就有1、2年同大學生活重疊，之後我好好彩去外國做嘢，所以有好多朋友都以為：『咦？你真係斷六親呀？好癲喎！』但我就好好彩，所做嘅工種係慳到錢，我去外國做嘅工作就係做工程師，又唔使點見客；另一方面，人生路不熟，所以冇咩朋友，但都有識到當地朋友，出去玩，就唔會燈紅酒綠囉。」如是者，岑先生到外國打幾年工後，回到香港做中學老師時，儲錢大計已接近尾聲，所以他慶幸自己年輕時能夠成功儲一大筆錢，成功上車。岑先生講到所買的單位樓齡已有返咁上下，實用面積又不算大，全因為儲到錢後都要諗前諗後。

岑先生早前講到原來其他受訪者係咁「爆」，亦有留意到港女Seasun講過「有樓有高潮」的理論，他認為：「可能佢覺得會好啲，個男人又有能力provide到畀佢，可能真係會表現得好啲呢，咁唔定呢。」但講到Seasun要求男人有樓仲要基本要求有2000呎，岑生說：「我覺得相愛係互惠囉，你要求得咁高，你自己條件方面，有陣時唔可以就咁judge個外表，如果淨係靠外表去吸引對方呢，就會好快冇囉，所以內涵好重要，除非你真係好高，高到對方可以無條件咁付出畀你囉，如果正常嘅話，都係兩公婆一齊努力囉。」至於Seasun早前話過，如果男方有樓但結咗婚，做二奶都不介意，岑生聽完好大反應：「唔好啦，我唔啱有二奶呀，我相信佢會搵到合適嘅對象嘅，佢外表條件都唔差嘅，但not my cup of tea，唔係佢差，係我高攀唔起；同埋性格要一樣。」岑生仲澄清與Seasun的理念完全不同。