【東張西望】林映輝入行28年四朝元老　難忘：訪問柏金遜症髮型師

《東張西望》不經不覺間已經去到第3000集，由2005年6月起總歷時已經超過10年，陪住大家長大的，唔止個節目，仲有節目入面一班嘅主持。而其中，就不得不提經歷了《城市追擊》《全線大搜查》《娛樂直播》《東張西望》的四朝元老，TVB工作了28年，人稱「輝仔」的林映輝。

昨日TVB更為《東張西望》慶祝第3000集舉行晚宴招待台前幕後的工作人員。林映輝（輝仔）接受《香港01》訪問時表示自己最開心的就是當上了外景主持。「因為做外景先可以有機會接觸到咁多市民，同埋佢哋又願意同我分享佢哋嘅故事。有時做訪問，聽下佢哋故事，其實又會啟發咗我。譬如有一次我哋去訪問『大同月餅』，原來當其他人都用晒機器造五仁月餅時候，佢哋仲係用手造。我覺得我哋做呢一個節目，有另一個意義，就係可以透過呢個節目，將呢啲知識傳承落去。」

3000集，真係得來不易，節目亦都有血有汗有淚。輝仔表示，最深刻印象的，莫過於是一次因為自己建議而促成的環節。「一個單親，因為自己個女智力有問題，所以佢就自己開咗間小店專門請智力冇咁好嘅人仕。另一個就係一個患柏金遜症嘅髮型師。嗰次訪問感觸好深，因為佢幫我剪頭髮，佢要食藥幫我剪。嗰次幫我剪頭髮一齊影咗張相，我宜家都有keep住。之後我哋要做一個過年item，我就提議將佢哋撮合埋一齊。佢哋就去單親媽媽屋企食團年飯，你個髮型師就幫班小朋友剪頭髮。個髮型師後尾同我講返，好少會感覺到咁溫暖。嗰個item我覺得做得好有意思。」

問及輝仔，演藝學院畢業的她會否捨棄目前主持人的工作而投身劇組。她說：「其實我2樣都鍾意，2樣都揀唔到。」 最近，輝仔更特別提到：「我真係好多謝咁多位監制一路都用我。」輝仔工作認真之餘，原來都冇忘本。