【港女講感情】余文樂王棠云拍拖一年閃電結婚　Timing真係好重要

星期二本來就唔係一個好日子，啱啱過咗星期日，但又有排先到星期六，點知拎起電話碌吓IG，余文樂PO結婚相，吓？乜佢結婚咩？冇任何先兆，明明記得佢上年冇耐先認拍拖，間唔中會係IG放閃曬吓女友，但突然就話結婚，唉，好Sad，今日應該係「Blue Tuseday」，樂仔終於封盤結婚做人夫，相信大家都冇異議，將今日定為法定失戀日。

余文樂自從同Kary（吳雨霏）分咗手之後，儘管大家都笑佢係Fishermen Lok（費沙文‧洛），惡搞佢係NBA球星同高比打波，佢自創嘅服裝品牌「Madness」又被陳冠希笑係Copyness，好多款都疑似同其他知名品牌「致敬」，但冇可否認佢係城中少有嘅型男，著衫有自己嘅一套風格，仲帶起咗著阿伯波鞋New Balance嘅熱潮，網民仲因為咁而命名做嗰隻色做「樂仔灰」。陳冠希被趕返大陸之後，樂仔就接手咗佢以前所有潮牌嘅工作，基本上佢著咩係身，一眾潮童都會照辦煮碗跟住著，自從佢開始留鬚之後，仲多咗陣男人味，真心係正嘅。

余文樂IG度寫話：「在對的時間，遇到對的人，感謝上天把最好的妳安排在最好的時候出現。」其實都啱嘅，有咩嘢贏得到Timing？其實佢之前同過盧巧音、黃伊汶同Kary公開過戀情，佢自己都講過鍾意叻嘅，又照顧到自己嘅女仔，其實以上嘅女仔要求都fit，但問題個男仔冇心定落嚟，咩都係假。就好似鄭伊健同梁詠琪咁，拍拖幾耐有幾愛都冇用，最尾都係被蒙嘉慧後來先上馬，年紀到咗，唔知係唔係荷爾蒙關係，周董、郭富城都浪子回頭，甘心戴上戒指做老襯。

「樂仔結婚了，新娘不是我」，相信係所有樂仔粉絲嘅心聲，「佢遇唔到對的人，係因為佢冇遇到我啫！」，算啦，冇遇到就係冇遇到，點都要認命，這些機會不是屬於你的。