【港女講感情】農夫氹Do姐笑到肚痛　人生有個搞笑朋友的確好極

近期最Hit嘅話題一定係農夫同Do姐夜晚嗰個旅遊節目，內容唔係重點，重點係人腳夠好笑，講真大台拍旅遊節目基本上係個個月都有，都係換湯不換藥，對上好似森美帶住班𡃁妹，又或者杜如風Solo去日本，個反應都冇農夫同Do姐咁好，點解呢？森美同「學是學非」幾個女仔雖然已經夾咗好耐，有晒默契，但可惜被森美一個做主Key大男人咁窒佢哋，第一次可能好笑，之後都會覺得悶，冇咩火花；而杜如風鍾意佢嘅人就好兩極，一係就好Buy佢呢種又癲又喪嘅風格，一係就話佢死港女淨係識Shopping，即係食唔晒兩家茶飯，都係fail。

但農夫同Do姐呢Pair就真係冇得輸，唔係話之前嘅主持唔夠好，只係相比之下，Do姐佢哋之間產生嘅化學作用贏幾條街！Do姐貴為大台阿姐級人馬，相比起汪阿姐，家燕姐，Do姐畀大家感覺係知性一啲，好似之前拍《男親女愛》、《一筆Out消》都係做女強人嘅角色，之後再踏入廣播界做DJ一樣撈得好掂，所以好多重要嘅場合都會搵到Do姐做主持。而農夫初初入行係跟住陳冠希唱Rap，之後人人都識唱佢哋首《風山水起》，但未必好認識佢兩個，到之後入屋拍電視節目先令大家了解到邊個係農夫，原來佢哋轉數咁快，講嘢咁搞笑。

Do姐嘅知性威嚴加上農夫嘅風趣幽默，一拍即合，換咗其他人都唔會有咁好效果，即係變咗汪阿姐大家就會彈佢嫌三嫌四，但Do姐大家又會服佢喎；而農夫呢種轉數快，又肯做下把位，唔會下下都要攞彩唔受得氣，實屬難得，一凹一凸，，吸引咗一班平時唔睇電視嘅朋友，都特登早啲返屋企睇Do姐，你就知個節目有幾成功同好笑啦。

其實一班朋友入面，「農夫」呢個角色好重要，唔理喺中學、大學，就算出嚟做嘢都好，都總有一個人係做下把位被大家笑吓，為大家帶嚟歡樂。但邊個會肯做醜人呢？人人都想做Do姐，做笑人嗰個，又有邊個會想唔討好，被人嘲笑？但就會有一個人抵得諗，甘願做笑柄，仲會肯主動自嘲，就係為咗令大家開心，如果有個咁抵得諗嘅朋友，大家真係要好好珍惜。