【港女講感情】言承旭林志玲世紀復合　兜兜轉轉只有一位難以代替

成日聽人講話：「愛得深，愛得早，不如愛得剛剛好。」三樣嘢好似只可以揀一樣，諗起都有啲SAD，但Why not both？言承旭同林志玲復合就係最好嘅例子，由2001未拍《流星花園》嗰陣，兩個人已經因為做Model而認識，到2003年戀情首次曝光，之後一直被媒體影到拍拖，雖然佢哋冇公開認愛過，但言承旭同林志玲嘅戀情係大家默認嘅事實。嗰時林志玲拍戲墮馬傷得好嚴重，言承旭即刻放低手頭上嘅工作去探佢，似乎地下情要浮上水面，但喺呢個時候又傳出林志玲同某小開有緋聞，佢哋分分合合，兩個人中間傳過有同其他人拍過拖又散咗，到今年2017已經走到第14個年頭，呢段糾纏不清嘅感情，似乎預告住佢哋真係命中注定嘅一對。

言承旭同林志玲「愛得早」，早喺2003年戀情曝光；「愛得深」，14年嚟兜兜轉轉，發現愛嘅都仲係大家；「愛得剛剛好」，佢哋兩個再唔係廿幾歲年少氣盛嘅年輕人，唔再係尋找激情而係想穩定。台灣嗰邊仲有傳佢哋準備結婚，兩邊都透過經理人同工作室回應話多謝關心，叫大家畀啲空間佢哋咁話，唔通真係好事近？

圈內人拍拖往往成為大家嘅焦點，即使係金童玉女都未必一定有好結果，就好似方力申同Stephy（鄧麗欣），聽完佢哋合唱《好心好報》，再睇埋佢哋戲假情真嘅葉念琛三部曲，最尾都係分手完場。當年胡杏兒對住黃宗澤講過「難頂」的宣言，感動過13億人口，「我知道我好多缺點，我都好難頂，但你都好多缺點，你都好難頂，我們一路頂住大家」，結果8年感情最尾都係頂唔順。有時愛得深、愛得早，都唔一定愛到最後。

拍拖十幾年固然係難得，但好似言承旭同林志玲咁，兜兜轉轉都係走回原點，就更係難能可貴。好多人一轉身，就係一輩子，好似梁詠琪等咗鄭伊健好多年，最尾鄭伊健娶嘅係蒙嘉慧，雖然好MK，但都係唔少港女嘅心聲，喺《我的最愛》唐寧入面咁講過：「我話唔要，即係要，我發脾氣，其實都係想你了解我，緊張我，如果我係街走左去，你一定要追住黎。」女仔講分手都係意氣說話，無非都係想有氹吓錫返，有時候一錯過咗真係追都追唔返。

最動人嘅感情，莫過於你一回頭，原來佢一直都企喺原地等你轉身。