【港女講感情】宋宋結婚好幸福　其實姊弟戀又有乜好怕

今日(31日)係宋宋結婚嘅大日子，宋仲基同宋慧喬由螢幕CP戲假情真，一套《太陽的後裔》將2個人拖埋天窗，終於走入教堂變宋生宋太，原來呢個世界真係有童話。開頭大家對呢對姊弟戀都唔睇好，宋慧喬今年36歲，大宋仲基足足4年，2個人之間唔止係年齡差距，宋慧喬早宋仲基12年出道，啱啱出道冇耐已經擔正女主角拍《藍色生死戀》，席捲整個亞洲，之後有同阿Rain（鄭智薰）拍《浪漫滿屋》，講起韓劇，宋慧喬基本上就上咗神檯，人紅自然接廣告接到心軟，佢同全知賢都堪稱係韓國嘅廣告女王。

好快呢對螢幕CP被傳媒影到佢哋拍拖，而佢哋好快又承認咗，又好快咁宣佈結婚，全部嘢都係極速咁進行。宋仲基畀人感覺青靚白淨，鬚根都冇條，淨睇樣就覺得佢吊兒郎當，玩玩吓咁，點知宋慧喬咁多個男朋友，好似李秉憲同玄彬咁，明明被人感覺好Man，好成熟穩重咁，但最後都係唔可以走到最後。反而呢個弟弟就最有擔帶，話結婚就結婚，仲推晒job去同宋慧喬籌備婚禮。

其實女仔講嚟講去都係想要安全感，安全感唔係話你有冇錢，好似宋慧喬咁，論金錢地位，完全係贏宋仲基幾條街，如果係講錢嘅，由一開始就唔會一齊。講到尾，女仔都係想搵個同佢手拖手走到最後嘅人，廣告都有講「給女孩一個家就是嫁」，李秉憲、玄彬就算表面幾住家男都冇用，依家咪又係娶第2個同其他女仔一齊。真男人係應該以結婚為拍拖嘅大前提，如果唔係結婚嘅就唔好晒大家時間，女人青春有限，社會成日洗腦話女人年紀越大就會折舊，遲結婚就話你賣剩蔗，三十歲未結婚就話你冇人要。宋慧喬今年就36歲，而宋仲基只係32歲，係佢嘅上位奮鬥期，但佢並冇因為怕影響粉絲而唔承認拍拖，或者拖住宋慧喬唔同佢結婚住，佢認真對待呢段感情，畀宋慧喬一個確確實實嘅承諾，咁先係個真男人！