【溫多娜手記】代理難撈　中原有團隊10月袋5球佣　又因乜解究？

二手樓市交投萎縮，中原、美聯先後放風，如果情況持續，年底前或者要裁掉「食白果」的代理；而中原10月更恐蝕逾1億元。代理業吹淡風，溫多娜都feel到陣陣寒意。不過，正所謂「一雞死，一雞鳴」，有代理10月竟逆市錄佣金500萬元，更拉大隊食日式鐵板燒慶功，認真happy！

溫多娜聽到咁好嘅消息，自然要「索下料」。中原地產粉嶺中心分行區域營業經理陳夑佳Caesar就透露，團隊如果繼續做二手市場肯定「搞唔掂」，故有「策略地」改做商業物業。佢話，旗下中原地產粉嶺牽晴間分行市務經理李海鑫Kim團隊10月促成多宗新地寫字樓W LUXE一籃子17個單位及車位成交，所以逆市創到佳績。

Caesar仲同溫多娜講，區內有許多內地投資者買入寫字樓，「佢地買樓要畀成3成稅，但買寫字樓畀嘅稅，同香港人一樣，最高都係8.5%，梗係投資後者啦！」