舊電視城廢虛滿回憶 驚見李國麟三字塵封14年
上回講到，有位廢墟攝影者，名叫阿海。他曾3次到訪過TVB舊電視城廢墟的見聞及照片，上載到由他所管理的Facebook專頁「5.76億世界」跟網民分享，並引起不少迴響。有趣的是，云云相片之中，發現有一張攝影室牆上寫了「李國麟」三個彩色大字，就咁睇又幾好笑，不過諗深一層邊個咁大整蠱，寫個大名上去，間接成為舊電視城check point？
（圖片經Facebook專頁「5.76億的世界」同意轉載）
《香港01》就這張照片訪問過李國麟本人，起初他聽到舊電視城有人在牆上寫下他大名，都感到莫名其妙：「唔係啩？會唔會就搬廠啲人手痕塗鴉下咋？（但寫你個名喎，係咪整蠱你？）我真係唔知呀，好奇怪喎都真係。」其後他突然想起細節，反問記者：「啲字係咪彩色㗎？有幾大粒呀」記者再形容字是彩色，有一個人咁高，字形帶有玩味，他如夢初醒，說：「啊！係我畫㗎！我十幾年前做訪問，當時就有個主題，我都唔記得啦，係用噴漆畫㗎！我諗係搬前做㗎個訪問，我又唔係成日做訪問，所以講講下就記得，原來仲喺度！」換句話說，攝影室的牆上是李國麟的真跡！望望下又幾靚，李國麟都幾有藝術天份。大抵當時快將搬離清水灣，所以畫完未有用油漆髹走。
講起舊電視城，李國麟坦言充滿回憶。他經歷過兩次TVB搬屋，印象最深刻就有：「當時仲喺總台（廣播道），就會出外景，當時都有去過清水灣片場㗎！記得有一個係片場出面，見住狄龍大哥，佢揸住吉普車，後面仲有隻大狼狗，就咁望就覺得佢真係好鬼死有型，心諗如果日日都嚟呢到就好啦，可以有機會見到佢。點知過多一排，總台就搬過嚟清水灣。」唔講唔知，除了最多人知的總台、清水灣電視城之外，很久以前TVB的錄影廠遍布各地，例如葵涌廠及堅地廠，李國麟講完笑說：「真係要老鬼先知㗎！」
除了集體回憶，清水灣電視城最多就是都市猛鬼傳說，李國麟聽罷，笑說：「真係去到邊都有呢啲鬼故，由總台到而家將軍澳，都成日傳㗎！其實好多都係道聽塗說囉。（你自己有冇見過？）我做咗咁多都真係冇乜點過，不過我信呢樣嘢係存在嘅，如果我見到嘅話，咪打聲招呼囉，都唔需要怯嘅。」而他在清水灣的日子，聽到鬧鬼故事，可信性比較高就有：「有時候會聽到同事喺邵氏五場停車場，夜媽媽見到有嘢飄過。又或者明明時裝廠，就會見到個古裝嘅人行過囉（咁女廁係咪真係好猛鬼㗎？）呢個我反而就冇點聽過。」不過李國麟再講一個同事經歷，相對地恐怖：「有個同事佢就係新聞部做化妝，當時佢就係化妝間等standby，佢就伏咗喺檯到，佢就趴住睜開眼，點知見到有個著住繡花鞋嘅人行近。當時佢就諗好好地新聞部點會有人著繡花鞋，即刻驚到唔敢抬起頭。」
其實點解好傳唔傳，會傳電視台好猛鬼？Long哥就此分析：「好多時都係人多口雜嘅啫，有好多地方、人都會有宗教信仰，信神，或者有陰陽眼。真係見到嘅話，咪同人講，講下又加啲，加下加下就講到好恐怖。」不過，就環境角度，Long哥都有一番見解：「電視城有booking嘅時候，咪有好多人氣喺度囉，但一到夜晚，就會變得冷清，又陰暗，就會好容易令『佢哋』聚居喺度，會靜啲。以人性角度，都唔會想畀人騷擾啦。」不論這些傳聞孰真孰假，Long哥話：「只要你冇做咩虧心事，其實唔需要驚呀！」有道理！