李國麟爆無綫頒獎禮絕望真相　綠葉王撈足42年：要自己諗定未來！

無綫萬千星輝頒獎典禮圓滿落幕，賽果當然是有人歡喜有人愁，而賽前已被指是炮灰王的馬國明，一如所料，坐足成晚冷板櫈，而跟他多次合作的李國麟，在倉底劇《流氓皇帝》中，再次跟馬國明有對手戲，而對於好友再次陪跑，李國麟無奈表示「戥佢唔抵？係都戥咗自己唔抵先啦。」

入行42年的李國麟，對於頒獎禮嗤之以鼻，「同馬國明合作咗好多次，佢係好演員、乖演員，話佢無運？佢又套套都做男主角，但講到有無獎，又要睇好多嘢，始終得一個視帝。」李國麟表示明白頒獎禮有好多商業考慮，「做咗咁多年都知道遊戲規則，想攞獎先要入佢哋嘅圈子，咁我又唔鍾意咁做，而且我哋呢啲合約藝員，頒獎禮嘅時候咪擺埋一邊囉。」

李國麟對於「親生仔」的潛規則，至今仍憤憤不平，「喺我角度睇，我74年已經入無綫拍嘢，我覺得自己先係親生仔。」在無綫有不少綠葉配角，多年來受盡冷眼，仍選擇留在無綫，只為了心中的一團火，否則很難在圈中生存，李國麟亦承認自己確實喜愛演戲，「拍劇時大家都有一團火，一班同事其實好開心，好有團隊精神，老實講如果用依家嘅努力，出去做其他嘢，人工一定更加好。」

不過李國麟亦坦承近年劇集質素是下降了，皆因無競爭的環境，對演員、觀眾也不是一件好事，「劇集嘅質素係跌咗嘅，點解呢？因為度火減咗，以前有麗的、亞視，對家有啲乜嘢，我哋就要即刻變陣迎戰，依家都無仗打，演員亦得一條路無選擇，為生活都會繼續拍嘅，係枯燥啲㗎啦。」

李國麟不介意無獎攞，可以繼續演自己喜歡的角色，滿足到表演慾，但有時只得一、兩場戲，對於從影多年的李國麟，卻要保持自己的專業身價，試過推劇得罪過人，不夠聽話，久而久之，頒獎禮入場券變成過眼浮雲，「做咗咁多年，出街一定有人認得，但次次都只係記得角色名，真名噏到口唇邊都係講唔出，以前會唔高興，但依家知道咁先係好嘢，公司都無promote到個人，人哋叫得出角色名，即係我演得成功啦。」

近日無綫被有線幫入主，反而效力了多年的老戲骨，如麥包、李天翔、陳國邦等藝員，相繼被放棄，或轉簽部頭約，李國麟會否覺得公司將藝人用完即棄，相當無情？李國麟苦笑道：「呢個商業社會，只會同股東交代，至於藝人就要自己諗定未來，為自己打算，唔通到入老人院嘅時候，仲要人養呀。」李國麟不怪公司無情，但他早已到內地掘金拍劇，又接拍電影及網絡電影，不用賣無綫帳，講句嘢都大聲啲。