無綫舊電視城變廢墟 猛鬼傳說女廁14年未變過
眾所周知，TVB電視城座落在將軍澳工業區。不過，TVB成立了50年，期間搬過兩次屋。第一代TVB總部現已變成了高尚住宅；至於舊電視城，自2003年9月之後，就再沒有任何用途，隨年月被荒廢。《香港01》對此詢問過TVB外事部，他們表示舊電視城已經轉讓給其他業主，不再是TVB的用地。
（圖片經fb專頁「5.76億的世界」同意轉載）
儘管舊電視城已經變成廢墟，這個曾經創造無數電視業顛峰的地方，實在滿載不少經典回憶，所以周不時吸引不少熱愛廢墟或攝影人士前來探險。最近，Facebook專頁「5.76億的世界」連日來上載了3個相簿，負責人分享了3次到訪舊電視城的見聞。從相片可見，舊電視城被荒廢足足14年，經已變得殘舊，大量雜草攀附外牆上，有好些地方的天花有著發霉，或者生鏽的痕跡，周遭堆滿雜物，充滿拆卸到中途的場景，陽光隱約曬落地面，營造的氣氛甚為蕭瑟，有幾分冷清。如果單人挑機的話，身處走前一步都有迴音的環境，相信會不寒而慄，起雞皮疙瘩。
不過，3個相簿見街之後，引起不少是TVB現任或前任員工的迴響，紛紛留言細說在舊電視城工作的趣事，經他們廣傳之下，網民因為照片而大開眼界。《香港01》就此訪問過「5.76億的世界」負責人阿海，他是個90後青年，對廢墟攝影充滿濃厚興趣，發掘香港城內的大小廢墟，「因為廢墟畀我好多想像空間。」而舊電視城是他人生第3個踏足的廢墟。阿海表示，之所以到舊電視城探險，因為電視是集體回憶：「我唔係TVB Fans，不過細細個都會跟阿媽睇電視追劇，而且童年有邊個返屋企唔係睇卡通片？廢墟入面又可以睇到細個睇電視節目嘅相關物件，包括配音員讀稿同佈景板等等。」阿海去完一次後，發覺意猶未盡，其後兩次發掘更多不為人知的地方，就連過往廢墟探險者大呻難去的新聞部都去過。
相簿裏，大至錄影廠、配音室、影片修復室，小至洗手間、劇本、通告及菲林等，阿海都有拍下分享給大家，他說：「唔係好多人會影啲唔重要嘅文件，但我會影埋，因為有機會搵番當事人。」認真有心。雖然舊電視城理論上是歷史，可是有時建築擺設及都市傳聞的影響下，踏足時腦海自然浮起一連串記憶，產生緊張感。尤其相簿裏，有一張照片是一堆菲林上插著邵氏創辦人邵逸夫年輕時的黑白照片，只要你晚上用手機看到，內心都會嚇一嚇，阿海反而就沒有太大感覺，他說：「睇你用咩心態去睇，睇你當佢係鬼定歷史。」好明顯阿海個膽大到一個點，所以當年盛傳最猛鬼的女廁，他都照影無誤。對於踏足廢墟，阿海樂此不疲，暫時都沒有「撞嘢」的經驗：「廢墟冇可否認多啲鬼故既，但我玩左咁耐都未遇過，有機會畀我撞下又唔驅！（點解？）因為啲朋友話撞過，我去咁多都見唔到有啲唔合理。」果然夠大膽。
阿海上載了廢墟相簿後，有不少網民詢問廢墟地址，但他對此一概不答：「我係影相，唔係做導遊。同埋冇必要講出黎，每個地方既回憶係留番畀果度既人，位置同進入方法唔討論之外其他都可以問。」所以，有心想探險的人，想搵總會有方法搵到嘅！
Facebook專頁「5.76億的世界」：www.facebook.com/5.76world/