簡慕華離開無線　做足17年無留戀：自己喺TVB冇突破！

簡慕華在無線17年，每次演出都令網友激贊。（網上圖片）

識做戲唔等於一定攞獎，尤其在電視台，幾多好戲之人，一個獎都冇，簡慕華就係其中一個例子。2000年港姐出身，入行17年，剛完成劇集《超時空男臣》正式離巢，她接受《香港01》電話訪問時說「系呀，我離開TVB，主要原因系我覺得自己停咗喺到好耐，去學嚇嘢又好，或者input下自己，我其實系想揀嘢做，我離開系因為TVB冇得選擇，冇得選擇自己喜歡可以或者自己鐘意嘅角色，但如果我出咗去，所有嘢我都可以自己選擇囉。」

簡慕華不同其他失意離巢藝員，她在劇集角色戲份越來越重，在《超時空男臣》、《翻生武林》兩套未出街的劇中，角色戲分亦令她滿意，但她最想要的是挑戰，她說：「我鐘意有挑戰性，我好少睇網上留言，但我覺得自己喺TVB冇突破喇，我好唔想有日觀眾會話 『又系簡慕華』、『簡慕華咪又系咁』、『做極咪又系簡慕華』之類，（有邊個角色妳最鐘意？）咁耐以來，所有角色我都覺得如果畀我再做多次可能會好D，（頒獎禮永遠都冇份，有咩感覺？）無辦法，人哋好過我，下次努力過…...唉！都做咗咁多年人啦，如果我唔系咁諗，我點繼續做人？（即系失意？）仲未，我仲有團火，你一失意就世界末日㗎，唔可以negative，前面永遠是最好的，我會咁諗，一日仲系呢行，一日都有機會，除非觀眾已經唔想再睇我。我緊張觀眾唔鐘意我，多過驚冇獎攞。」