【入行十年】港男冠軍變旅遊節目翻譯　翟威廉：好耐冇諗過未來　

機會是留給有準備的人，聽落好有道理，但看着自己「張張刀，張張利」，機會卻只是在面前飄過，甚至落在其他人身上，心裏面的滋味肯定不好受，說的正是2010年港男冠軍翟威廉。年輕時在日本留學，近年再到韓國進修，說得一口流利日語及韓語，再加上跆拳道及鋼琴，文武兼備，在無綫卻欠缺一個代表性角色，簡單如「認到個樣」亦只是近年的事。

在處境劇《愛．回家之八時入席》中，翟威廉飾演靚仔醫生Dr. Lee，高大有型，形象入屋，甚受網民歡迎，滿以為等到一個上位機會，原來又是過眼雲煙。《香港01》記者跟翟威廉進行訪問，恭喜他獲得一個好角色，怎知他說「無㗎啦，已經拍完，劇裏面我係過場嘅啫。」他補充說：「依家要忙排台慶表演，今日仲要去《踩過界》開鏡拜神。」原來翟威廉在新劇飾演朱千雪男友，但問到他角色的詳情，他卻笑說：「其實都係客串，在一個單元出場。」其後是尷尬的沉默。

同是港男冠軍，袁偉豪在早前播畢的《城寨英雄》中，以牙佬一角成為全城焦點，贏盡掌聲，而翟威廉早於兩輯劇集《飛虎》中，跟袁偉豪合作，當時二人也只是混在一堆飛虎隊員中，但袁偉豪今天是力捧小生，翟威廉跟好友差不多時間起步，沒有暗暗比較一番嗎？他淡然說：「慢慢嚟啦，每個人際遇都唔同，位就係得咁多，而且每個演員都有自己特質，可能個角色好啱佢呢！」翟威廉接着說：「其實多嘢做梗係好啦，但冇咁多嘢做，亦都有好處㗎，一來無咁辛苦，可以多啲時間見下朋友，陪下屋企人，人生唔係只得工作嘅。」

不過上天十分公平，翟威廉雖然少了拍劇，但由於他精通日語、韓語，無綫知人善任，或者是連翻譯也想慳埋，所以每逢有日韓的旅遊節目，翟威廉也是主持人的不二之選，先後主持過《廉遊韓國》、《嘯後瀛風》、《最瀛自由行》及《滾動四國》。他笑說：「係㗎，日本韓國節目，大多數都搵我做。我鍾意見到啲技能用得番，除咗日文、韓文，仲有跆拳同鋼琴，做藝人呢啲都有用。」但翟威廉還嫌自己韓文未夠班，所以去年到首爾慶熙大學，短期進修兩個月，在無綫藝員中相信只有中韓混血兒的宋芝齡可以跟他鬥韓文。

翟威廉不但是港男冠軍，更曾參加過亞視的亞洲先生選舉贏得亞軍，粗略計算已經入行十年，而引用柴九金句「人生有幾多個十年」，翟威廉不怕再如此下去，會被後浪淹沒？又有否為自己留另一條路呢？「之前都仲有好多前輩嘅，呢段時間都係人生一個經歷，而且我唔係好差啫，比上不足，比下有餘啦，講成名快，快唔快得過荷李活嘅星？要跟人比較，又比唔比得過李嘉誠個仔呢？而且做咗十年，好難轉行㗎喇。」

近年一班有線幫如洪永城、黃翠如、李佳芯紛紛上位，成為一線小生花旦，反而亞視舊將，卻只能慢慢捱，當中是否有着一種潛規則？「唔可以咁講，佢哋都有付出，而我自己就覺得工作好平均。」如果從未加盟亞視，會否走少了大段冤枉路？「我喺亞視都學到好多嘢，唔會話浪費咗，去到邊都有用嘅。」翟威廉徐徐道。

對於未來目標，翟威廉靜了一會，接着說「未來？好耐無諗過啦，搵咗錢先啦。其實依家認到個樣已經好開心，出到街大家都係街坊，咪傾下偈囉。」翟威廉最期待是一個可以發揮的角色，「拍得劇耐，有時都會扑中啲好劇，但好睇出街啲觀眾反應，監製都估唔到㗎。」與其等待，翟威廉不如乘着現時正吹起韓風，隨時能闖出一片天。