【迷】御用秘書專一23年　何綺雲愛男友：分開3年再走埋一齊

何綺雲大約22歲遇到這位男朋友，女人最靚、最黃金的時間給了這個男人，但分手收場，女生一定會為何綺雲不值，但她沒有這樣覺得，她說：「當時我冇咩覺得唔抵，反而係一種解脫。熱戀期過咗就係另一種關係，耐咗冇分開，係因為大家一齊咁多年，生活上可能要好多嘢都要大家一齊，冇嘢發生，大家就一池死水咁生活，大家嘅關係懶得走，當一種感情變成一種習慣嘅時候係幾唏噓，但我覺得每個人都要有方法去處理。」

20年戀情談婚論嫁好正常，但何綺雲覺得兩個人一齊最重要，其他形式化事情反而其次，「因為一齊太耐，過咗嗰段想結婚嘅時期，之後都冇諗過，我諗大部份嘅人都係咁，我又冇話想生小朋友，因為生小朋友係一個好大嘅責任嚟，我唔敢，我哋已經一齊生活，唔覺得要用張紙去support我哋嘅感情，最重要係大家愛大家。」

拍拖20年之後分開，三年後再一齊，除了男方的誠意，她覺得一段關係雙方都有責任，她說：「20年好多嘅感情狀況都出現過，開心、唔開心試過，大家一齊捱又試過，我哋一齊住，但分手前，大家關係好似只係同房住咁，當時我哋冇面對過呢個問題，反而分開咗嗰三年，大家都有檢討，原來除咗佢之外，我都要負責任，但某啲嘢大家都要改，唔係就會返去之前嗰狀況。我哋分開嘅頭一年，真係冇點聯絡，甚至唔想見佢，但佢都一直keep住搵我，之後第二、三年就愈嚟愈搵得多，令我哋再走埋一齊，係因為佢講嘅一啲說話令我好感動，佢話：『….唔驚啦，你唔係一個人㗎，仲有我嘛，不如我哋住返埋一齊，我哋慢慢嚟啦。』我諗佢嘅意思係，我係妳嘅backup囉，真係唔特別，但我聽到，有啲感動，因為我覺得佢可以繼續enjoy佢嘅single life，會問自己其實我係咪應該返去佢身邊呢？佢係一個好明白我嘅人，又能接受我啲古怪性格，我工作唔順利又好，乜都好，佢總會好支持我，分開咗3年都走返埋一齊，係一件幾難得嘅事。」

上年，何綺雲和男友復合，二人再同居，大家更互相遷就，令關係好過以前，她說：「我以前成日叫佢食完煙，可唔可以食返粒香口膠呀？佢而家連煙都戒埋，我好鍾意佢搽香水，主動買咗好多支畀佢，佢以前特登唔噴激我，但而家都會噴下，佢反而冇咩要求我，剩係叫我開咗嘅蓋要「㩒」返好，有啲手尾，佢其實真係好就我，佢只係想我陪多啲佢食飯，傾下計。我唔相信一段感情係永遠有愛情火花，你要接受火花會熄咗，之後會變咗另一種光芒，由愛情關係變做另一種關係，大家遷就生活細節好重要，以前你覺得好冇所謂嘅嘢，之後變得好有所謂，因為愛嘅成分好大，但當感情成分多過愛情成份嗰陣，可能好少嘢都變得好大件事，呢樣就要大家攞出嚟講同大家去改。」