【乘勝狙擊】黃子雄外表風流實專一 拍拖8年：冇送過情人節禮物
《乘勝狙擊》本週大結局，雖然套劇如此多「bug」，但總算娛樂到大家，劇中搶鏡的不止主角，反而兩位叔叔，單立文、鷲哥有時更吸引。除了兩位有驚喜外，首次飾演擦鞋仔，愛溝女的黃子雄亦令人耳目一新，劇中他花弗又識氹女仔，但原來現實中好專一，和前無綫藝員夏竹欣拍拖8年，名符其實係「長情劍」。
臨近情人節，以為表面風流的黃子雄會好有創意氹女友，誰知原來是悶蛋一名，8年來沒有送過情人節，甚至聖誕節禮物，更加連花都未買過，他接受《香港01》訪問時說：「8年來情人節我都冇送過情人節禮物，花都未送過，我有個諗法，就係啲花好地地喺泥土入面，點解為咗送俾人而整死佢呢？啊！以前喺英國有個女朋友我有送過，不過我係成盆花送畀佢。我唔係咁buy into情人節、聖誕節嘅人，老土講句，如果係開心嘅，日日都係情人節，唔需要揀一個好commerical嘅日子，餐廳特別charge兩三倍嘅價錢，去食一餐你第日都係食差唔多嘅舉動囉。」
外表鬼鬼地，流利英語，傳聞還是富二代，當然是筍盤，但黃子雄自言香港女仔唔啱佢，但現在和一個土生土長的香港女仔拍拖8年，他說：「大部份香港女仔都唔buy我，佢哋想要嘅我都俾唔到佢，好難有一個香港女仔會鍾意我囉，我以前嘅對象都係鬼鬼地呀，背景同我差唔多，我哋溝通都係英文，即係竹星妹啦，初初認識夏小姐大家都有啲感覺，但都有少少抗拒，佢唔係我識開嗰隻，但我又諗咁多年，我拍過好多次拖，同過所謂我嗰type拍拖都冇結果喎，嗰陣又到咗一個年紀，點解唔試下未試過嘅type呢？其實我都唔知點解？我諗夾啩？」黃子雄雖然講得輕鬆，但很多時被拍得和夏竹欣拍拖，二人感情相當穩定。
黃子雄以前絕對是「無腳雀仔」，有傳他做過14對新人結婚司儀，有一半都離婚令他對結婚失信心，他說：「其實我而家做咗廿幾個婚禮，其他之後有冇離婚我又唔係好知，因為當時做嘅14個，好多認識嘅都離咗婚，我好多朋友都離婚，我自己都嚟自一個分開咗嘅家庭，我個人對結婚呢個concept唔係太著重，我唔係太鍾意小朋友，我又覺得兩個人係咪一齊唔係特別需要小朋友的話，唔需要結婚啦，嗱！但我唔一定唔結而家，我要make sure 先囉，我結得就唔想離婚。所以而家都可以睇定啲先囉？（拍咗8年喎？仲要睇？）我有朋友一齊咗廿幾年都冇結婚㗎。我女友都冇家庭壓力要佢結婚，佢亦冇催我。我以前真係唔想結緍，試過有個女朋友想結婚，但我仲未想，跟住佢就離開咗香港，佢去咗美國就結咗婚喇。但而家我心態唔同咗㗎喇。」
黃子雄和女友夏竹欣能克服七年之癢，他說沒有秘訣，最重要是坦誠，他說：「我好boring，兩個人最緊要坦誠，我同佢因為拍《同事三分親》認識，最浪漫嘅事？冇喎，我諗旅行啦，因為佢做過呢行，佢好了解我，可能佢性格又男仔頭啦，我哋唔興節日送禮物㗎，不過我好記得有次，佢送咗件曼聯長䄂波衫畀我，嗰件好難搵㗎，其實我話過畀佢知嘅，但收到都開心，就係溝通囉。好多時收到嘅禮物真係冇用喎，唔係咩？有冇七年之癢？No, 8 years 一定有風浪but nothing can’t sail through!」Well….黃子雄是不是好男友只有夏小姐先知，但唯一肯定的是黃子雄女友是百分百的好女友，單是不用送情人節禮物而值100分。