【2016最喜愛電視奸角】黃宗澤夠賤格 吳岱融：鍾意鷲哥陰森內歛
古語有云「一角救全家」，在2016年無綫屢出膠劇之下，網民早已深深體會得到，全年最突出的角色，往往不是正義凜然，滿口仁義道德的主角，反而越邪惡、越奸詐，甚至賤到出汁的奸角，才會成為網民心中那杯茶，在迎接2017年就為大家細數「我最喜愛的電視奸角」，究竟誰人奸到不止被鬧，仲會被網民讚奸得好睇，奸到有機會在台慶攞獎呢？
《巨輪II》吳岱融
由蕭正楠擔正的《巨輪II》，劇情講……算罷啦，無人會記得，最讓網民津津樂道的角色，只有吳岱融飾演的高天鷲，半白頭髮，西裝骨骨，行出來的懾人霸氣，已經夠晒台型，個樣煞食固然重要，鷲哥更屢爆金句，「成個地球都知妳係乜呀，臭雞」、「同妳one night stand啫，妳估fall in love呀」，令角色出位又立體外，鷲哥更被網民洗板式激讚，可惜吳岱融最後未能贏得台慶頒獎禮「最受歡迎男配角」獎。
吳岱融接受《香港01》記者訪問，他表示：「攞獎嘅嘢，都係睇演員遇唔遇到好角色，唔一定演奸角嘅，之後都有其他唔同類型角色。」將於1月中播映的《乘勝狙擊》，吳岱融跟陳展鵬飾演兩父子，他會再演大惡人，跟鷲哥比較他又喜歡哪個角色呢？「梗係鍾意鷲哥啦，夠陰森內歛，而《乘勝狙擊》個角色就比較火爆，而且戲份得十集左右。」
《幕後玩家》黃宗澤
本來《幕後玩家》主題是揭開公關公司鮮為人知一面，故事發展當然係無乜啦，轉為大玩男女三角關係，就係咁跑出咗「世紀賤男」黃宗澤，究竟他點賤法呢？劇中他飾演的秦昇海，搭上小三劉佩玥，迫到老婆襲嘉欣精神崩潰，之後當然不少得拋妻棄女啦。常人去到這個階段，都應該要落地獄，但黃宗澤仲未夠皮，利慾薰心的他為錢更搭上本來跟蕭正楠一對的黃翠如，觀眾一邊睇一邊鬧，到他被黃翠如毒死一幕更是大快人心，黃宗澤演奸角可算相當成功。
《城寨英雄》歐瑞偉
台慶頒獎禮的大贏家，一定非《城寨英雄》莫屬，除了誕生出視帝視后外，在播映期間，更令全城競猜誰是Final Boss，由張國強估到去三姨婆梁舜燕，最後揭盅竟然是平日樂於助人的楊老闆歐瑞偉，劇中歐瑞偉演得十分出色，心狠手辣，大開殺界，更騷出他硬橋硬馬真功夫，跟在《八時入席》中搞笑形象的KC，完全是截然不同的兩個人。劇中唯一美中不足是結局時，竟然話練就鐵布衫的歐瑞偉能夠移動罩門，而盲眼展鵬跟定欣咀嘴後，竟可憑感覺知道其罩門位置，令神劇爛尾收場。
《律政強人》廖啟智
智叔出名是演技派，忠奸角色也能駕馭，而《律政強人》是他回歸無綫之作，劇中他飾演的寸嘴大狀劉謹昌，經常跟張強（方中信飾）鬥智鬥力，為贏得官司無所不用其極，性格陰險歹毒，權力慾極重的他，原來是性無能，更企圖強暴前妻李璧琦，卻又無能為力，瘋狂暴戾，自卑又自大，角色獲得網民激讚。不過有網民指劇中對白跟港視劇集《選戰》的宋萬山如出一轍，令人覺得兩個角色重疊，對智叔來說只是非戰之罪。