楊思琦大讚8個月大囝囝有運動細胞：佢爬上梳化頂！

香港開電視將全港首播NHK第100部晨間劇《夏空》，特邀請星級靚媽楊思琦為日劇唱主題曲。今日（6/11）思琦身穿性感露背晚裝長裙，現身柴灣為新歌拍攝MV。思琦表示：「自己以前好鍾意睇日劇，當時日本風好勁，記得細個嘅時候，仲同哥哥一齊去報讀日文班，不過自己嘅資質冇哥哥咁好，我都係讀咗初級班，之後讀完冇再讀，反而哥哥就好有興趣繼續讀。」

提到8個月大囝囝近況，思琦直言落足心機照顧，「囝囝而家算係易湊，因為佢好早就戒咗夜奶，所以可以一覺瞓到天光，但有時就會11點12點醒吓，就要沖奶畀佢飲。不過佢都好好動，試過爬上梳化椅背頂，好犀利，人仔細細好有運動細胞，因為家姐之前我未見過有咁嘅舉動，所以我都估唔到佢會咁好動。」