大媽在山澗沖涼引起嘩然　森美：叫佢下次唔好啦！

近日網上瘋傳大媽公然在山澗全裸沖涼影片，大媽浸浴時引來兩名大叔從旁駐足觀看，影片一出引起全城嘩然，有網民鬧大媽傷風敗俗。森美今日（20/10）現身上環出席活動時笑言：「我就冇睇到喎，會唔會你哋睇錯呀？係咪金山嗰隻美猴王嘅金狒狒喺度游水咋！然之後你哋阻住人哋。你哋肯定佢係人？唔係馬鞍山雪怪呀！」

森美續指：「講真如果洗手洗腳就唔好啦！會影響人哋嘅水源，始終有啲村民真係會攞嚟飲用，況且沖完涼啲皂泡同啲污水，係要經過過濾先可出得大海，如果直接流海就會造成污染，影響生態環境。」（見到咁嘅情況會否出面阻止？）森美笑言：「如果見到係少女，我就會即刻喝止，如果係大媽，就俾佢沖多一陣，因為佢年紀大，叫佢下次唔好啦！如果係男人就要鬧，因為好不雅，始終男人可以去芬蘭浴，不過任何人咁做都唔好啦！」