【開心速遞】KC同Icy父女戀修成正果? 岑杏賢:期待之後嘅發展

撰文:鄺鈺瑩
出版:更新:

無線處境劇《愛‧回家之開心速遞》有多對CP,而最新一對輪到岑杏賢 (Jennifer) 飾演嘅Icy同歐瑞偉飾演嘅KC。
其實KC同Icy呢一對,之前已經有唔少鋪排,上星期劇情講到儘管KC被Terry「燉冬菇」變成初級文員,但Icy一啲都唔介意,更趁機送上愛的抱抱。發現Icy對自己有意思後,KC似乎十分抗拒,並多次暗示二人之間嘅年齡差距,令Icy一度以退為進,用「好朋友」身份同KC相處,而另一邊廂,Icy喺大龍生面前為KC講盡好說話,最終令KC回覆高層身份。「黑化」Terry(李偉健飾)有見及此,自把自為幫KC搞咗個表白派對,而Icy更當眾送上香吻。雖然Icy事後知道KC系無意同自己拍拖,但就似乎完全唔介意,而網民對於Icy同KC呢一對都十分受落,唔少更認為好過Helen(姚瑩瑩)。
對於呢對新CP嘅發展,岑杏賢接受《香港01》訪問時透露暫時未有任何新動向。「其實都有同 KC討論過,佢覺得呢個組合都幾新鮮,可以嘗試發展。但最重要都系睇編劇點寫,同埋網民嘅意見,都開心大家會去討論KC同Icy。」劇中Icy明知KC唔鐘意自己,但都願意做其女朋友,岑杏賢笑言呢啲劇情現實中都可能會有。「如果發生喺自己身上的話,個心一定會唔舒服,但如果真繫好鐘意對方的話,可能都會好似Icy咁戀愛大過天。」拍拖如同單戀,岑杏賢認為最終受傷系自己。「而家會理智啲,同埋會帶眼識人。」其實岑杏賢曾經同袁偉豪拍拖3年多,關係更去到談婚論嫁嘅地步,傳出「分訊」時,除有傳系因為聚少離多外,有指系因為男方當時事業有起色,將婚事進行拖得就拖……難怪岑杏賢話要帶眼識人。