袁偉豪開live前女友岑杏賢突入　重提前情：最緊要向前行

袁偉豪去年底宣佈跟岑杏賢分手，曾經喺頒獎禮喊曬多謝女友，最近終於放低舊情傷，承認同張寶兒拍拖，感情照睇都幾穩定。不過今日袁偉豪同薛世恆齊齊開live嗰陣，岑杏賢竟突然亂入，袁偉豪即時顯得好緊張又關心，更重提一件鮮為人知嘅往事。

經常俾人話撞樣嘅袁偉豪(右)同薛世恆(左)一齊開live，大家覺得似唔似樣？

袁偉豪同薛世恆經常被指似樣，所以今日一齊喺Big Big Channel開直播，畀觀眾睇下有幾似樣，同時玩咗幾個二揀一遊戲。

但系玩玩下，主持人發現有個叫Jennifer嘅網友出現，懷疑係岑杏賢，袁偉豪即刻好緊張咁靠前睇下主持人部手機，並好肯定咁講：「系呀，真系佢嚟喎！」又向住鏡頭同岑杏賢打招呼：「喂！hi Jennifer！你入嚟又真系要講啲秘密出嚟，你唔介意呵？」譁突然有秘密要爆，系咪感情嘢先？

袁偉豪就話件事同薛世恆有關：「幾年前我啱啱同Daniel（薛世恆）認識又同Jennifer認識嘅時候，Jennifer唔知Daniel系邊個，純粹系一個朋友嚟！有次Jennifer同Daniel講：『你好熟口面呀，你好似一個人，你好似陳法拉個老公囉！跟住Daniel話：『我哋幾個系朋友嚟！』（在場朋友）一個即刻縮低，一個打打下機就擰轉面，跟住Daniel原本揸住啲嘢：『我入廚房洗碗先。』講到哈哈大笑。

薛世恆就苦笑：「我根本冇介意過任何嘢，嗰下我感受唔到尷尬，只系感覺到氣氛結咗冰啫！」袁偉豪繼續講：「後來話番畀Jennifer知，得啖笑囉！」然後好緊張睇下岑杏賢有冇睇緊：「離開咗未？」岑杏賢未離開但冇回應。

然後有網友贊袁偉豪好大方，袁偉豪就好正經咁提起跟岑杏賢嘅關係：「Jennifer就真繫好大方，畢竟大家行咗一段時間，大家都好理解大家性格，最緊要向前行啦！都系想大家開心之嘛。」今次袁偉豪冇喊喇！不過講講下都睇下現任女友張寶兒有冇殺埋入嚟，好彩又冇囉！