【開心速遞】HeHe畫面正過BL漫畫　安仔朱凌凌成最新CP

無綫（TVB）處境喜劇《愛‧回家之開心速遞》裏面有好多深受觀眾愛戴的CP（配對），包括入圍《萬千星輝頒獎典禮2018》「最受歡迎電視拍檔」的「大小姐」林淑敏、「送水輝」許家傑以及「KC」歐瑞偉、「Terry」李偉健，而最近又有一對CP誕生，而且更比上述兩Pair更後生、更養眼。

在昨晚（27/11）播出的一集中，「安仔」周嘉洛為了撮合「心如」蘇韻姿和「佐治」張明偉，特登讓他們在微電影中飾演情侶，點知兩人毫不過電，搞到周嘉洛和「朱凌凌」吳偉豪忍不住出手示範，上演了兩幕情深款款的「HeHe」戲碼。

點擊下圖觀看周嘉洛和吳偉豪的BL畫面：

好多觀眾、網民睇完周嘉洛和吳偉豪的BL場面後都非常興奮，更有疑似「腐女」立即開Post跪求編劇將兩人寫成一對愛侶，又話周嘉洛和飾演其女友Bonnie的林凱恩愈來愈不登對：「佢同朱凌凌有化學作用得多！今集真係睇好感動，編劇應該聽取觀眾意見，撮合佢哋。」

有人睇完這段貼文後大表同意，話好希望二人可以名正言順做CP：「好多國家都好熱衷拍BL劇，保守如南韓咁都拍咗好多齣，大家都唔好咁保守，TVB都唔好與時代脫節啦！」

其實周嘉洛和吳偉豪在戲裏戲外都是好兄弟，絕對稱得上Friend過打Band，拍這類BL親密場面都應該手到拿來，但周嘉洛卻大爆當時數度笑場要NG，他接受《香港01》訪問時說：「有忍唔住笑，拍呢兩場戲都忍唔住笑咗好多次，但係我哋都係好專業嘅演員嚟，都好投入、好認真去看待件事，劇情交代我演繹畀我三姨（蘇韻姿）同佐治（張明偉）睇個戲係點做，所以我哋都係好認真去做，笑多幾次就冇事！我本身都係好鍾意同Ricco（吳偉豪）演戲，好開心觀眾好鍾意呢啲火花。」

至於周嘉洛本人又怎樣看「安凌配」這對新CP？是否與觀眾一樣，好想他們能夠「在一起」？他說：「我都希望可以滿足大家！但係我未收到類似嘅劇本。咁我自己對任何劇種都抱住好開放同願意接受嘅態度，網友意見係好緊要，都希望佢哋睇得開心，但劇情上嘅都係交返畀編劇啦！」哎呀，即係各位要等下喇！