【跳躍生命線】繼大小姐之後　再有《開心速遞》角色現身結局篇

《跳躍生命線》今晚大結局，追開的朋友，除了留意一眾主角的下場外，記住留意有四大彩蛋，當中有個仲係鋪排了２４集，監製保証大家睇完一定有完滿的感覺，而拆開這個重要彩蛋的人物，竟然係魯賓遜…… 

未講終極彩蛋之前，先講第一個彩蛋，是發生在在哥（馬德鐘飾）身上，昨晚阿Man就發生交通意外且情況危殆，送院急救期間，勾起在哥一幕又一幕亡妻阿芯離世畫面。在哥喺醫院遇上魯賓遜（張國強），輾轉搵返佢喺小巴上跌咗嘅骨灰鑽石，於此同時，在哥發現之前諾兒遇溺時要救過佢嘅醫生，曾接受眼角膜手術，而捐贈者正正就係醉駕撞死阿芯嘅司機林茂祥，一切似乎都係整定。


 

裘叔小蝶和好如初

結局各主角通常有超完美結局，不過happy ending都有不同層次，而裘叔小蝶這一對，就有一個特別的結局，監製方駿釗：「裘叔小蝶就有一個轉變位，關係有啲突破，但未去到完全無嘢，觀眾會有淡淡然嘅感覺。」

 

魯賓遜恢復記憶

雖然大家都知魯賓遜，這個角色鋪排了廿幾集，最後清醒返係一定的套路，不過相信觀眾都會享受這一段戲，患有認知障礙的他，喺醫院檢查後突然恢復記憶，原來佢一直拎住嗰部「玩具相機」真係work，並且拍下在哥、傑仔，仲有佢老婆嘅生活點滴。監製方駿釗「大家都估KK係final boss，但佢有自己的感人故事，而佢故事係為全劇做round-up。」這一幕應該係各主角，眾人回帶，一回帶就起歌，當然又會出現返雄姐啦，擺定盒裝紙巾喺隔離就啱喇。

 

《開心速遞》Terry亂入

喊完之後，應該請觀眾食個甜品開心返，監製話歐瑞偉飾演的王Sir將會在救護局重遇一個好熟悉的拍檔，大家見到會有驚喜。雖然方駿釗堅拒透露呢個「拍檔」係邊個，不過其實都唔難估啦，邊個同歐瑞偉最夾最有默契吖，都係得嗰個啫！其他劇演員入同一時空，其實美劇常有，無綫都可以玩下喎，如果最後出現馬季就正喇！（降魔的也是監製方駿釗作品）