被吳業坤影響差點忘詞　田蕊妮：我直情想打佢！

田蕊妮（阿田）昨晚（25日）在《勁歌金曲優秀選第二回》憑著派台歌《兩口子》奪歌曲獎，因為以前阿田的音樂作品都是以翻唱為主，所以今次是她入行二十多年來第一次以自己的歌得獎，她形容感覺「好得意」。

轉行做歌手的阿田直言做歌手比演戲壓力更大：「歌手係自己企喺個台度，又自己入錄音室，靠自己去演繹首歌，雖然監製、作詞作曲都幫好多，但始終都係比較個人嘅一件事嚟。而演戲係一個團隊。」壓力甚大的阿田指自己待機時已經很緊張，誰知吳業坤（坤哥）卻令她更緊張：「頭先我一路坐喺台下等緊嘅時候，坤哥成日都話『死啦，唔知陣間記唔記得歌詞』我直情想打佢！原本我都記得好穩陣㗎，佢係咁係隔離話唔記得歌詞搞到我都好驚會唔記得歌詞！」

在演戲、音樂方面都得到肯定，阿田最近主持的節目《女人四十》更入圍《萬千星輝頒獎典禮2018》的「最佳節目主持」及「最佳非戲劇節目」共兩個提名，但她竟然對於自己被提名一事完全不知情：「吓係咩？咁好開心喎！幾時頒獎典禮？不過唔好諗咁遠啦，節目未播完㗎，希望大家多多支持！」拍完整個節目，作為女人最大的領悟是甚麼？她表示：「女人一定要識得欣賞自己，唔好被外界眼光規限自己。有咩好同唔好，其實去到呢個年紀你自己一定知道。」