《女人四十》田蕊妮講錯英文　網友：To後面幾時加ing呢？

男人四十一枝花，女人四十爛茶渣？由田蕊妮主持嘅全新節目《女人四十》，每集搵嚟唔同嘉賓，大談40歲女人嘅唔同經歷。其實對於現今女性嚟講，無論你係20、30定係40，只要有自信就乜都得！

阿田喺節目中同觀眾探討女士們熱切關注嘅問題，當中更獻上唔少鏡頭前嘅第一次。首集阿田分別面對一班10後同00後小朋友嘅挑戰，不過對佢嚟講都無難度，仲獲得「27歲靚女」嘅認證，難怪阿田都話D自信即刻返曬嚟呀！

每個年齡都會有唔同嘅經歷，講到結婚生仔呢個話題，唔少女士都覺得30歲最啱timing，始終無人想做高齡產婦。阿田更到私人診所檢查子宮健康，獻上絕密片段！

唔好以為40歲女人無market，阿田喺節目中大玩Speed dating，仲有10幾個合適對象，一眾男士使出渾身解數，當中不乏筍盤，好似科技公司創辦人Jerry、電競公司創辦人Derek等等，但唔知係咪因為緊張得滯，阿田同Derek打招呼嗰陣，就講咗句「Nice to meeting you」……oops，「很高興見到你」係「Nice to meet you」又或者「Nice meeting you」先啱呀。節目一出就掀起網友熱烈討論，甚至越講越興起，一個post升華到變咗做「To後面幾時要加ing呢」，其實有D情況底下，To後面跟動詞要加ing，最常見嘅例子就係look forward to（期待）：「I look forward to seeing you.」（我很期待與你見面。），仲有be addicted to（上癮）：「I am addicted to watching soap operas on TV.」（我沉迷於看肥皂劇。）等等。大家以後識得點用啦！

其實阿田為了這個節目付出咗唔少：「由構思這節目到拍攝，當中遇到了不少困難與未知數，我也是一邊拍一邊體驗，大部分時間都是要臨場變通，過程中真的學習與體會了很多。」不過對於節目中穿插嘅英文句子，觀眾最緊要係睇清楚，唔好跟住學錯咗呀。