【跳躍生命線】再見馬子仁！　羅天宇：真係有人叫我譚Sir

羅天宇今日（23日）與一眾《跳躍生命線》劇中演員跟學生進行籃球友誼賽，天宇坦言自己在運動方面比較弱：「以前中學嘅時候我媽媽覺得籃球場好雜驚我學壞，跟住就唔畀我打波啦，所以後尾佢就覺得『點解我個大仔唔係好高又唔太外向呢』，於是就叫我細佬去試多啲打多啲籃球，所以我細佬而家高我半個頭。」

劇集播放後大受歡迎，最近人氣急升，社交網站粉絲更衝破10萬大軍。天宇為答謝大家支持，特意在社交網站上載拿着結他自彈自唱的片段獻給粉絲，發現他原來深藏不露！他稱一直都有鑽研唱歌技巧：「我自己都會上網Search下啲Turorial教唱歌，學下點發聲咁。如果觀眾反應好，會再學好啲，再試下擺多啲唱歌片上網。」他也表示媽媽快將生日，希望可以自彈自唱作禮物送給她。

天宇表示最感激的就是聽到很多人都叫他做劇中角色「譚Sir」：「終於唔係馬子仁喇，真係有人叫我譚Sir！（開始脫離馬子仁的形象？）少少啦，但頭先都有幾位學生家長『嗨！馬子仁』，哈哈，希望慢慢有多啲唔同嘅角色啦，咁人哋就會認得我係羅天宇！」