【跳躍生命線】淋巴化驗屬良性　劉佩玥：醫生話可能會唔好

無綫劇集《跳躍生命線》一眾演員今日（23/10）出席在將軍澳舉辦的「跳動青春 合作無間」活動為劇集宣傳造勢。劉佩玥在劇中飾演一名電單車救護員，往往需要率先到場冷靜果斷處理傷者。Moon透露早前與陳瀅結伴行街時，碰巧有人意外受傷，並即時上前協助：「我嗰日將車停泊好之後，行行下突然聽到一把男人聲慘叫，然後跟住聽到有小朋友喊聲，原來有個三歲嘅小朋友喺樓梯意外撞爆咗眼角，成面都係血，當時佢爸爸都好方寸大亂，我咁啱拍緊呢套劇集，突然救護員上身，立即用我之前所學到嘅嘢發揮出嚟，我好果斷咁叫佢爸爸要保持冷靜，首要抱個小朋友到客戶服務中心然後報警，當時個小朋友不斷咁喊，我就同個小朋友講：『一陣爸爸就會同你去醫院，記住要聽哥哥姐姐話，如果你繼續咁喊，爸爸會好擔心，然後我就叫小朋友跟住我做深呼吸，佢真係跟住我做，佢之後真係冇喊，雖然我唔係一個真正嘅救護員，但我只能做到就係安撫傷者嘅情緒，旁邊嘅陳瀅仲話我：『我見到個天使呀。』」

此外，阿Moon早前身體不適入院，經醫生診斷氣管淋巴出現問題，淋巴核化驗結果屬於良性：「醫生話我免疫系統失調，可能工作時間長唔夠時間休息，所以俾啲病菌入侵咗，一開始嘅時候自己都緊張到喊，我仲未結婚同生仔㗎，唔想咁快就有事，因為照到有三粒淋巴核黐埋左一齊，醫生都話有機會可能做變成癌症，好在發覺得及時，係屬於良性，而家我中西合璧去治療，希望可以快啲好返。」