【跳躍生命線】雄姐原來會死？　何廣沛、張彥博保持神秘唔肯講

撇除何廣沛呢個污點，無綫新劇《跳躍生命線》自開播以來都算口碑不俗，陳榮峻飾演的明叔同吳香倫飾演明嬸呢一對，劇情鋪足一個星期，上星期終於爆發，睇到最後無命嗰個竟然係平日無病無痛嘅明嬸，唔少觀眾都大讚編劇鋪排得非常之好，亦相信之後會再有人「離去」。

其實如果有留意片頭的話，其中一幕係眾人以全黑上陣，手執白玫瑰，神情嚴肅，地點疑似係浩園，而企喺墳前嘅係何廣沛。再睇睇劇照，有譚家俊（羅天宇飾）、常朗天（李霖恩飾）、高行仁（韋家雄飾）、陸昊然（郭子豪飾）、麥在田（馬德鐘飾），甚而連消防及救護學院方Sir（冼灝英飾）亦在場，「雄姐」呂劍雄（張彥博飾）雖然唔見蹤影，但由於佢五個家姐都有列席，似乎暗示了雄姐之後會死。
 

其實劇集由雄姐同卓定傑去面試、受訓到齊齊被派去長沙灣救護站，都有不少二人同撈同煲的畫面，最後變成賺人熱淚的「死線」絕對唔奇。到底邊個會死呢？求証於郭子豪、何廣沛、張彥博同羅天宇時，四人都大賣關子，聽到何廣沛話自己係：「衝動死」之後，郭子豪同羅天宇就話自己會係「冷靜死」，而最大嫌疑的張彥博就話「我係睇住人死，因為救唔到嘛」，「衝動王」何廣沛解釋話：「其實每集每人都經歷過唔同嘅死，被問過好多次，我哋係唔會講，大家繼續睇啦。」