黃翠如生日蕭正楠送蘋果樹蛋糕　原來隱含訂情密碼

今日係黃翠如 37 歲生日，男朋友蕭正楠當然要識做啦，佢搵埋成班兄弟，踏正凌時凌分同女朋友慶祝生日，仲別有心裁地預備咗一個有喻意的蘋果造型蛋糕，相信翠如一定冧到爆。

蕭正楠早前同胡定欣、姚子羚同曹永廉去咗瑞士拍旅遊節目，同女朋友翠如小別，返到香港，Call 齊成班兄弟，包括曹永廉、袁偉豪、區永權、楊潮凱等，為翠如慶祝生日，畀成班佬包圍，呢個生日真係陽剛味勁濃！初頭蕭正楠仲扮無驚喜，只係準備咗一個普通連鎖店生日蛋糕，但踏正12點，就搬出一個巨型蘋果蛋糕出嚟，呢個蛋糕並唔係一個普通蛋糕，成個造型原來蘊含咗「愛的密碼」！

蕭正楠同翠如拍拖4年，佢哋因為合作《師奶Madam》而結緣成為戀人，蕭正楠在劇中角色叫「羅大樹」，翠如飾演「花蘋」，而蛋糕的造型係一個巨型蘋果被心形樹枝包圍，喻意大樹會一直愛同保護花蘋。蕭正楠以電話回覆《香港01》說：「第一部同佢拍嘅劇係《師奶Madam》，劇中佢叫蘋果我叫羅大樹！所以就造咗蘋果樹蛋糕嘞！」真係超級 Sweet 呀！

唔只咁，翠如亦在 IG 公開同蕭正楠之間的暱稱：「謝謝蕭一，為我準備了一個全男班的生日飯，一班男人的約會，總覺得我也是男人的一分子，謝謝各位俊男，祝黃二我生日快樂」，叫男友做「蕭一」，自己做「黃二」，真係好有夫唱婦隨的感覺，唔知幾時先聽到佢哋嘅好消息呢？