【美女廚房】與蕭正楠大放閃光彈　黃翠如煮羊膝得1分感動到喊

本身有一個廚師妹妹的黃翠如，曾被男友蕭正楠取笑「連蛋都唔識得煎」，昨晚（19日）亮相蕭正楠主持的節目《美女廚房》，張寶兒及梁嘉琪大鬥廚藝，嘉賓方面有黃宗澤及吳卓羲。蕭正楠今次藉著節目，有幸第一次試到女朋友手勢。

蕭正楠同翠如公然在節目上打情罵俏，蕭正楠笑說自己的身材好過翠如，激到翠如用刀指著男友說：「你除衫睇你係咪過我！」蕭正楠馬上回應說：「你知㗎！」兩人公然放閃，不停被眾人起哄快點去紅棉道註冊結婚，笑料百出。

第一回合大家都認為翠如係「地獄廚神」，批評她煮的指定菜式，還說洋葱湯的味道似竹蔗水，吳卓羲更直接將她煮的羊膝吐出來，一啲都唔畀面。唔緊要㗎翠如，個個都唔撐你，仲有男朋友撐，蕭正楠對翠如說：「真係唔難食，冇人欣賞你，我欣賞你！」隨即將整碟羊膝掃入口，令翠如感動到流眼淚。不過佢最後都係好公道地畀1分。

經歷過首回被彈，翠如在第二回合使出真功夫，煮潮州魚粥挽回面子，獲評判一致讚賞，仲話蕭正楠「執到」，蕭正楠說：「我都係第一次食佢（黃翠如）煮嘅嘢。」翠如更感動得眼泛淚光，對男友說：「唔可以再話我煮嘢難食！」睇嚟翠如相當在意自己在男朋友的形象，所以先一直唔敢亂煮嘢食畀男朋友食。