吳卓羲都買唔到劉華飛　公開求位：希望畀一個半個panel位我坐吓

最近不少演唱會都出現「絕望坐位表」的情形，再加上黃牛黨肆虐，粉絲們認真叫苦連天。豈料「民間特首」劉德華的演唱會亦不例外，20場跨年紅館騷，公開發售約60000張門票即日全數沽清，連單丁位置都一個不留，而黃牛飛亦有傳由$980炒至$38000，認真是一票難求！可憐吳卓羲（Ron）亦大呻難買！

Ron在去年與華哥合作拍攝電影《拆彈專家》，而他本身亦非常支持華哥，惟昨日出席時裝活動時他表示能否購入演唱會門票仍是未知之數：「唉，呢個問題我都好想知，我一陣要問我經理人。咁但我梗係好想買到飛啦，不過噚日（4日）睇到新聞，半日就話沽清喇，真係無辦法啦，咁我都要去嘅其實，無飛都好啦，希望華哥都畀一個半個panel（控制台位置）位我坐吓啦！（踎樓梯得唔得？）踎唔得，panel有位坐嘅！」

最近阿Ron剛過完生日，其生日派對大合照中，更因他手搭異性膊頭而一度傳出新女友疑雲，不過他亦已即時向傳媒否認。Ron有份參與的劇集《飛虎2》即將於十月開拍，在正式開工之前，他希望宅在家中：「我喺屋企好多嘢做㗎！我鍾意搞啲雕塑呀咁，又搞呢搞路，唉，總之我喺屋企一起身就好忙㗎喇，（雕塑？）即係漫威嗰啲呀，咁有時就打吓掃咁，啲朋友叫我出嚟飲嘢，我都叫佢哋嚟我屋企，咁我就最舒服嘛，點醉都好我一檻就上床喇。」