方中信被《陰陽路》編劇劉孝偉借名騙財：幾萬蚊都呃唔係咁好

方中信日前（8月31日）出席Tumi品牌活動，對於近來報道電影《陰陽路》編劇劉孝偉涉嫌騙財千萬資金後失蹤就表示略有所聞。據知劉孝偉集資拍攝電影《告別之前》成功之後，更以相同手法向其他人游說投資《癮密》，而方中信及容祖兒更被借名為電影中的主演。

對於無辜被利用一事，方中信就說：「有聽過，朋友有轉發畀我，好似話用咗祖兒同我個名吖嘛。我自己都覺得好無奈囉。（你本身識唔識劉孝偉？）唔識，冇合作過。我睇過新聞佢幾萬幾萬咁去呃人，就唔係咁好囉。幾萬蚊都係呃係咪吖，香港地都有好多有抱負嘅人。（身邊有冇朋友有損失？）我啲朋友都會問下我啦，佢哋應該冇損失，如果有損失都會搵我。（你自己有冇類似經歷？）試過有人用我個名去做代言，其實我係冇嘅。試過喺網上面有一個賭博程式用咗我個樣而我係完全唔知。（之後點解決？）冇得解決㗎，係啲粉絲話畀我聽，我唯有交畀公司處理。」