【好想睇】惠英紅首演舞台劇即做百老匯經典：緊張到爆微絲血管！

惠英紅今日（22日）以一身黑色喱士連身裙出席品牌活動，她最近正在與內地導演陳凱歌的兒子陳飛宇拍戲，兩人飾演一對母子，講起呢位囝囝，紅姐也讚不絕口：「非常之有才能，同埋好靚仔，好高，好細個，19歲，又識唱歌，又識樂理，同埋英文、中文、法文乜都識，好犀利。」

紅姐的舞台劇處女作《玻璃動物園》將於12月上演，雖然她演戲經驗豐富，演技了得，不過首次挑戰舞台劇也令她大呼緊張：「我個腦不停喺度Repeat嗰個劇本，因為個劇本真係好厚，咁我四肢全部嘅微絲血管爆哂，哇我第日起身我好驚，做咩點解咁樣，跟住隻眼一邊又紅哂，好大壓力呀！」紅姐貴為金馬、金像雙料影后，竟然也會被此事難倒？「其實舞台劇我係第一次做，同埋係做一個咁出名嘅名著，嗰下原來咁多嘢講，同埋咁大嘅變化，所以唔想差囉。」

由發布的海報來看，紅姐身著旗袍，眼神略帶傷感，未到正式演出已經引人入勝：「其實呢個喺百老匯已經係一個幾廿年嘅舞台劇嚟嘅，經常被翻做返嘅，係講外國舊世紀嘅一家人，而家就轉咗喺香港嘅60年代嘅一家人，咁每個人嘅性格都唔同，做苦媽咁樣。」