王歌慧唔願做親生女　同大台傾足6個月：簽經理人約好困身好辛苦

16歲已經被黎明睇中提攜入行的王歌慧 (Emily) ，當年簽約A music旗下以歌手身份出道，可惜只出了一首歌就被投閒置散。至前年簽約無綫重新出發，雖然並非大台親生女但仍獲得不少工作機會，做過音樂節目主持又拍過劇，角色戲份愈來愈多亦好搶鏡。正當大家以為Emliy會在TVB有一番作為時，她卻透露原來與TVB兩年的合約已於6月時完約，並不會續約，決心要往外闖，仲話：「我想同ViuTV合作。」

到底是甚麼原因令到Emily不再續約TVB？她說：「呢兩年TVB一直都對我好好，畀咗好多機會我，我好多謝佢哋。我哋今年年頭已經開始傾續約嘅事，佢哋畀咗好好嘅offer我叫我留底，要求我簽TVB經理人合約，年期係5年以上，但係我鍾意自由自在，亦都想同其他團隊合作，例如ViuTV，想喺出面闖下。家人反對我走㗎，唔支持我離開，有勸過我話始終大台大公司會穩定好多，又話我失業，係無業遊民。不過自己性格唔適合喺TVB工作，自己喺人際關係唔係好識得處理，喺度就要social多啲，公司大始終會複雜啲。我自己適合喺新啲嘅公司工作，無咁多制度。」

不少TVB藝人都希望可以被公司簽做親生仔女，即是簽經理人合約，估不到呢個竟反而是Emily不續約的主要原因之一。她說：「我唔想咁困身，以前簽A music係一個唔係咁好嘅experience，被綁死咁多年覺得好辛苦，又無嘢做，走又唔走得，真係有陰影，所以再簽長約嘅話我會有啲怯，覺得好綁死喺一個地方，話就話公司會安排嘢畀我做，但都好睇自己嘅際遇，無嘢可以保證㗎嘛。對我嚟講留喺TVB嘅賭博性更大，我想個主導權掌握喺自己手度。如果想喺TVB長做，決心要喺TVB發展係要簽長約同經理人約嘅，簽咗先會有更多嘅機會。但我喺出面發展唔理想，大不了唔做，我唔想零話事權，只有公司揀晒job畀自己做，我自己份人係比較有主見嘅。」

Emily直言如果現在不趁後生走，之後也不會走了，一心想出外見識的她要試過才心息。她說：「其實自己都鍾意stable，但又想試新嘢，所以好矛盾同好爭扎。我都唔細喇，今年28歲，趁依家要出去見識下，闖下，要試下。（去內地發展？）自己想留喺香港發展，聽聞大陸更加要講關係。我想同ViuTV合作，除咗拍劇，都想試下主持旅遊飲食節目，會嘗試自薦下，依家開始聯絡緊，睇下會唔會有合作機會。我覺得就算依家唔多人睇ViuTV，將來都會愈嚟愈多人睇嘅。」

Emily又話女仔到了某一個年齡就會諗結婚生B，她亦一樣，如果要同TVB簽多年長約，她亦未必有咁多時間可以commit得到，到時會想放多些時間在家庭上面：「呢方面都要plan下，簽咗長約就無得話唔做㗎喇。」

場地提供：港威酒店Three On Canton