【棟仁的時光】王歌慧感激黎明提攜：對我好好，只係無工作畀我做

黎明 (Leon) 作為A Music的老闆，向來喜歡發掘新人加入樂壇，王歌慧 (Emily) 亦曾是他的愛將之一。Emily於2006年簽約Leon即備受Leon力捧，當時只得16歲的她憑住淡定的笑容被Leon睇中兼提攜入行。可惜推出了兩首歌曲後，她的歌手路便沒有繼續下去。之後她轉向電視界發展，拍過HKTV的劇集，至2015年Emily正式簽約TVB開始拍劇。曾經獲黎天王愛護，每次工作出入都有幾個人傍住，包括公司同事、助手、髮型師和化妝師等，對她照顧周到就如溫室小花一樣。如今加入TVB後卻要重新來過，由配角開始做起，再沒有人跟出跟入，現年27歲的Emily又有甚麼感覺呢？

她說：「以前公司比較多同事，我又細個，佢哋都好照顧我。例如會打電話嚟叫我起身，有公司保母車接送，又會安排埋我飲食，買埋嘢畀我食。」而入了TVB後，當然就無這些待遇了，不過她並不介意。她說：「其實我自己鍾意演戲多過唱歌，我覺得自己唱歌麻麻地，同埋唱歌比較個人，感覺有啲孤獨，我鍾意拍劇一大班人大家一齊努力嗰種感覺。我唔會覺得難受又或者係唔習慣，反而咁樣可以令我更加獨立同自立，會識得點照顧自己，入咗TVB之後我學識咗好多嘢，成長咗亦都成熟咗，係好事嚟，喺TVB拍劇好多嘢都要靠自己去處理，做演員要識得執生。」

Emily透露當年簽約Leon旗下一簽就是8年，但多年來都沒有甚麼工作，她說：「Leon仲有公司同事都好錫我，對我好好，只係無工作畀我做啫。後嚟係佢哋提議我不如去試下拍劇演戲啦，我自己都好有興趣，前經理人陳善之後仲介紹咗我入TVB。」最初她於TVB是主持《無間音樂》，之後才開始拍劇。TVB出名人工低，對此Emily並沒有否認：「咁幾千蚊一定有嘅，我主要係睇機會，錢唔係最重要。」她坦言享受演戲多過唱歌：「我覺得依家比較充實，有工開有嘢做嘅感覺好開心。」對於一直有指她家境富裕，根本不愁生活，Emily表示：「其實唔係外界講得咁誇張，我咁大個人都想有能力可以自己照顧到自己，發展事業賺錢養到自己，唔想仲要靠屋企養。」她直言以前無工開無收入，的確是要靠家人support她的生活開支，但近年情況已經好轉：「我無畀家用屋企，但會買禮物，例如花膠嗰啲補品，係我一份心意。」