【棟仁的時光】王歌慧讚前老闆黎明又Nice又惡：有俾佢訓話到喊

無綫劇集《棟仁的時光》已經進入結局篇，在劇中飾演Kris (唐詩詠飾) 好姊妹的Viola (王歌慧飾) 雖然只是配角，但每次出場都幾搶鏡，成功令觀眾同網民留下印象。唔知大家仲記唔記得，其實現年27歲的王歌慧 (Emily) 於06年，即16歲時曾因爲獲得黎明 (Leon) 提攜而簽約A Music入行做歌手，可惜發展未如理想。至2015年Emily正式簽約TVB開始拍劇。

今日Emily與《棟仁的時光》劇中一班演員齊齊出席該劇的宣傳活動。她接受訪問時被問到會否覺得今次飾演Viola是最有發揮的一次，她說：「好多謝TVB畀咗好多機會我，之前拍過兩套劇嘅角色都好好玩，可能今次個角色多人留意啲，每個角色我都好用心去演，有唔同嘅嘗試都好開心。（終於捱到？）我覺得依家先係開始，係一個好嘅開始，感覺自己嘅演藝事業終於起步喇。」

講到Emily是因爲Leon提攜而入行做歌手，究竟Leon是怎樣提攜她呢？原來成件事係源於咁啱遇到！Emily憶述說：「嗰時我仲喺九龍塘讀緊書，有一日我同成班同學喺cafe食嘢，佢哋話見到Leon喺對面拍戲，咁我哋咪走過去睇，去到先知唔係拍戲，Leon只係喺度飲茶。佢好nice，主動同我哋傾偈，仲問晒我哋咁多個拎電話，話遲啲請我哋睇演唱會。點知事後我就收到唱片公司嘅人打電話嚟，問我有無興趣唱歌。我真係完全無諗過，以為係打嚟話請我睇演唱會，不過之後都有請我去睇嘅。」

至於是因爲咩原因被Leon睇中，Emily表示：「後嚟有問返佢話係因為我笑得好淡定。」而對於前老闆Leon的感覺，Emily說：「佢好照顧人，無架子，份人比較直接，可以好nice但惡起上嚟可以好嚴肅，我都有俾佢訓話過，話到我喊，但咩事已經唔記得喇。」對於被指家境富裕，是否就算無job都唔使怕？她說：「我同屋企幾少講錢，自己亦唔係打風流工，覺得咁大個人應該要賺到錢養到自己，無嘢做無收入都會幾大壓力。」她又笑父母都希望她快些甩手，可以早日嫁人。