【早霸王】運輸真漢子對新婚老婆呼喝　出街連手都唔拖先係愛？

又到星期五限定嘅《早霸王》「你知道唔知道有人掛住你」環節，今期男主角阿聰本身從事運輸行業，自認脾氣大又粗魯嘅佢，因為成日對老婆呼呼喝喝而激嬲對方，於是想借節目同佢道歉。呼呼喝喝呢種行為其實大多出現於老夫老妻之間，但奇就奇在阿聰同老婆只係拍拖一年、結婚一年，聽到呢度，連森美都忍唔住話：「一年你就呼呼喝喝 ？！」阿聰雖然話會改，但森美就認為最重要係搵出原因：「唔可以不停話我錯，要搵出原因、點解你會係咁。」

阿聰認為係因為太緊張對方所致，他又舉例說明：「過馬路想拖佢又唔肯，我會好暴躁，或者係因為佢有自主性，平時我都唔會拖佢，係認為佢有危險先拖。」手都唔拖到底係咩玩法，森美小儀即時充滿黑人問號，但亦表示如果雙方都接受其實問題不大，阿聰話其實除咗拖手呢個問題之外，最想同老婆傾吓生仔問題，但森美一聽到就話：「勸你改咗態度再諗生小朋友，因為小朋友出世後會更大分歧。」

電話接通後，老婆一聽到阿聰把聲，即時變得溫柔，而阿聰亦把握機會真情剖白：「老婆，我好想同你講對唔住，因為我平時講嘢好大聲、好粗魯，其實都係著緊你，我以後會努力去改善自己，我永遠都愛你，你愛唔愛我？」老婆聽完後都話多謝阿聰肯去改，但似乎聽唔到阿聰最後嗰句「你愛唔愛我？」於是阿聰就再一次咁話：「我愛你呀老婆！」運輸真漢子都有柔情一面。