【早霸王】男聽眾突破9年Friend zone：我會將最好嘅都俾晒你

Friend-zone似乎成了新世代去形容「朋友以上，戀人未滿」嘅曖昧的狀態，而呢個Friend-zone，今日亦出現喺《早霸王》嘅「你知唔知道有人掛住你」環節，男聽眾Peter九年前於夜校認識了Lucy，二人一直有保持聯絡，行街睇戲食飯甚至表白都做齊晒，可惜未能成為拖友。呢日諗住藉《早霸王》再表白，之不過，當森美問到點解會認為係時候成熟時，Peter似乎都唔係好知，只係話「單獨出街機會多咗，又會講吓屋企嘢。」聽到呢度，森美同小儀都認為朋友之間一樣會講屋企嘢，而更甚的是Peter從未同對方談及感情問題(例如鍾意邊類型男仔)，Peter解釋因為大家都係內斂嘅人，所以較少提到愛情問題，作為主持的森美，話晒都聽過唔愛情問題，而佢當下的結論就係：「擔心佢放咗你入Friend-zone」

Peter雖然未有因Friend-zone呢個字而打退堂鼓，但就補一句「佢生日嘛，如果（表白）唔得咪講聲生日快樂囉。」Peter透露每次同Lucy出街都會送佢返屋企，既然都願意比送返屋企，咁跟住呢？！「坐一陣就走架啦」森美同小儀聽到呢個答案真係失望到暈，森美更即時獻計，叫Peter下次坐吓對方張床，又或者索性表明自己想留底過夜……

電話接通之後，當Lucy聽到森美話有人想同你表白後，佢就只係意味深長咁「哦」咗一聲，但問身邊有無追求者，又或者有無朋友係得得哋時，Lucy都一而再咁話「無喎」，正當大家都以為呢個Friend-zone無突破時，Peter就勇敢踏出第一步。「我想同你表白，同埋想為你平反，去年你送咗份好特別嘅生日禮物俾我，搞到全世界都話你係失敗者，但我想話你唔係。你未必係世上最幸福嘅女人，但我會將最好嘅都俾晒你。」聽完表白之後，雙方都靜晒，森美輕輕推一把，問Lucy有咩回應，電話一方，有把好甜嘅聲，講咗句「I Love You」。