【早霸王】地盤工人向女友道歉中英夾雜　真漢子搵到right person

一講地盤工人，相信大家都好自然會聯想到，前陣子有地盤工人於暴雨下開工而爆出的「係窮呀！XXXX」金句，其實做地盤真係一啲都唔窮，因為一般日薪至少$2000起。而地盤工人除咗「係窮呀！XXXX」之外，原來亦有鐵漢柔情一面。就好似今個星期嘅《早霸王》「你知道唔知道有人掛住你」環節主角Gary，他表示今早同女朋友有少少拗撬，所以想借節目同對方道歉。「其實我哋感情路線圖都幾複雜化，今朝無理佢感受，佢放工好攰我仲問佢啲唔鍾意嘅問題，大家都在磨合當中，好想同佢講聲唔好意思，亦想我哋將來會行得更加好。」Gary隨後再表示想「道歉同肯定我哋依家嘅愛。」並解釋所指的愛情道路幾複雜，其實係因為之前所遇到對象並唔係太好，但有感這次終於找到了「right person」所以想令呢段關係更好。

聽到Gary說話夾雜了英文，而且表達清晰且文縐縐，森美都忍唔住同佢做邊一行，得知Gary原來係地盤工人後，都不禁大讚佢係「地盤詩人」。Gary提到今早之所以發生拗撬純粹係女朋友為見佢一面。「佢本身返通宵，所以我同時間有好大出入，溝通時間好少。佢本來想今晚同我食飯，但我收工之後有銷碎事務要處理（留在地盤整理工具)，怕要趕頭趕命食餐飯……」一講到呢度，森美即時愛情專家上身，指Gary幫對方諗得太多，並認為「如果佢想見你，又點會怕攰呢？你依家只會令佢覺得你唔想見佢。」Gary聽完之後並無任何反駁，更十分誠懇咁表示「我要改吓」，又指因令對方生氣而感到「好內疚」。呢啲男朋友真係去邊搵？

不過可惜的是，電話打咗兩次都無人聽，Gary唯有在對住空氣道歉:「今日真係唔好意思，我完全唔理你感受，我知道自己缺點係乜，我會盡量檢討自己去配合大家的愛情，希望你聽到呢段說話會更加開心，I love you。」知錯能改，真係唔係人人可以做到。