「大口九」葉暐離開TVB機會多　獲林慕德賞識翻唱《十萬個明天》

大家會否記得《十兄弟》中的「大口九」？他的飾演者葉暐（Adam）是前無綫藝員，和馬國明、吳卓羲等是第14期無線電視藝員訓練班的同期同學，在TVB工作18年，拍攝過逾百套電視劇，但多數是做閒角。2007年，Adam在《十兄弟》中飾演的「大口九」令觀眾印象深刻，本以為迎來事業的曙光，但現實卻背道而馳。

Adam在接受《香港01》訪問時，坦言自己都有想過《十兄弟》可能會是自己事業的一個轉捩點，但無奈因公司的政策而阻滯：「佢哋有重點栽培嘅人，所以自己都有啲失望。」雖然多年來，Adam一直星路平平，但依然用心去做好每個角色。

眾所周知，大台的人工好低，去年Adam更要慘被TVB減三分之一人工，本身只得萬幾蚊，這樣一來不是只有幾千元？Adam直言：「所以我都要離開，出去睇下世界，搵多啲機會。」

離開無綫升呢做男一　人工和休息時間倍增

離開TVB之後，Adam在一個偶然機會下認識香港電台DJ鄧慧詩，獲對方邀請加盟「框格音樂事務」，成為旗下藝人，工作機會大幅度提升。近排，Adam剛剛在內地完成網絡大電影《我的前世情人》拍攝，和陸詩韻、崔碧珈、內地演員梁子媛一起合作，有三位靚女做情人，Adam真是享齊人之福呀。首次擔任男主角，Adam自認無壓力，和劇組合作愉快，覺得好親切。至於片酬方面，自然都會提升不少：「係多咗好多，都多過TVB幾倍，咁又唔係話好富，正常嘅生活水平囉。」

TVB的工作時間長大家都知，Adam指如果戲份是跟住主角，一日會有4、5個鐘休息，但長時間拍攝，都是常有的事：「我曾經試過成個月都係瞓3、4個鐘左右喇，好辛苦，但係無辦法，TVB工作嘅時間就係咁樣，我哋做演員都要去適應，捱嘅唔止我一個嘅，好多個都係咁嘅啦。」但在內地，工作時間就舒服好多，Adam說：「喺內地有8至10個鐘嘅休息時間，咁樣好好多，如果演員本身好攰，拍出嚟嘅戲，觀眾都唔想睇啦。」做演員的確好辛苦，日曬雨淋，捱夜是常有的事，真是好難得有充足的休息時間。

熱愛唱歌幸獲音樂人林慕德賞識

Adam曾於1996年參加過全球華人新秀大賽，可惜最終未能入圍；2013年，他參與無綫電視的歌唱選秀節目《星夢傳奇》，雖然未躋身5強之列，不過就獲得大批觀眾讚賞。熱愛唱歌的Adam直言，現在自己多了好多唱歌的機會：「11月頭，周啟生有一連兩場嘅作品展，我會係其中一位嘅表演嘉賓。」除此之外，最令Adam開心的，莫過於是獲得著名音樂人林慕德的賞識：「我初初入咗呢間公司之後，咁啱鄧慧詩小姐喺舊年同林生已經有音樂上嘅合作，所以順理成章下，我咪有機會可以去參與林慕德先生作品嘅演唱。」

林慕德80年代就開始歌曲創作，和不少明星好似鄭秀文、張學友、黎明等都合作過，為香港樂壇創作了好多經典歌曲。能和林慕德合作，Adam都相當興奮，他透露林慕德將為他重新編排《十萬個明天》，作為《我的前世情人》電影主題曲：「林生好因而我嘅聲線去幫我嘅，佢將我自己嘅優點點樣發揮得最好嘅，大家互相去夾，最緊要有火花。」由於這首歌的兩位原唱楊楚營和李中浩，以及作詞人林振強都已經離世，所以這首歌背後的故事都好悲傷，相信Adam的重新演繹又會是另一番味道。

機會是屬於有準備的人

Adam離開TVB之後，在事業上的確有好大飛躍，講到當初離開大台這個comfort zone，會不會缺乏勇氣時，Adam坦言：「我諗每個人唔同，我係屬於有冒險精神嘅，都想事業上有突破發展，始終出邊機會多啲，18年，我都至少算有一些經驗，七成努力，三成運氣，當你積累到一定嘅時間，都需要機會。」如果當初不選擇離開，Adam認為自己的事業依然會同以前差不多，自從簽了新公司之後，他表示自己好開心，演戲之餘，還可以唱歌，相信他都會把握機會，去展示自己的專長。希望Adam以後的事業可以更上一層樓，人生就是這樣，沒有什麼選擇是錯的，只要自己不後悔。