【超級綠葉】李鴻杰離巢北上仲好撈 ：拍3日已經夠使2個月

近年真的愈來愈流行看舊劇，《刑事偵緝檔案》《真情》《男親女愛》等劇中的演員演技，真的會令人看到拍案叫絕。不過牡丹雖好，都終須綠葉扶持，其實綠葉之中都不乏唔少「影帝級」的資深演員，就好似在1997年《天龍八部》中飾演四大惡人之首「段延慶」的李鴻杰（傑哥）（英文名：Bruce Li）。

唔講唔知，其實李鴻杰 （Bruce Li）已經入行超過20年，大大小小參與過的劇集真係多如沙數。李鴻杰（杰哥）接受《香港01》訪問時說：「94，95年喺TVB嗰時都1年有3，5套劇係重戲。不過我最鍾意嘅都係柴九嗰套（巾幗梟雄）入面知院林大人個角色，《公主嫁到》個角色都好多人講起㗎。」當然，仲唔少得《天龍八部》的「段延慶」。杰哥表示，在中國大陸工作時，仍然會有人因為「段延慶」而認得他，更因此而幫他得到不少工作機會。

雖然大家對李鴻杰的印象是一名資深演員，但原來最初時杰哥是以舞蹈員身份加入TVB，其後更為多個大型活動編舞，包括1978年麗的電視的「電視先生」。直至1979年離開TVB。「嗰時香港好蓬勃嘅，有海城酒樓，有海洋酒樓，同時我亦都有幫亞視排舞，仲有夜總會排舞呢，嗰時好多歌星都喺出面走埠，都好多人搵我排舞。」及後，杰哥就順應新加坡廣電局邀請而到外地發展。「其實最開始係喺新加坡就開始拍戲，哈哈，所以變咗我一開始就係做有角色嘅戲囉。」

其實杰哥在95年左右就由新加坡回流回港，之後再回歸TVB成為演員。杰哥：「其實做咗演員之後都仲有排舞，不過就少咗啦。」時光真係過快，杰哥一拍就已經拍咗20年：「呢20年嚟喺TVB其實我使用率好高，數過其實我做過有角色名嘅，一年平均都有42套，即係我已經拍過800套劇。」其後2009年王維基宣佈開台HKTV，當時更邀請了李鴻杰過檔發展。談到當初到HKTV的原因，杰哥說：「一來可能你都聽過，TVB份人工唔夠人哋糊口㗎嘛。（我聽過後有後生演員月入7千）係囉，我哋啲老嘢咪最多多一倍，咁唔係好夠用㗎嘛。二來其實當時王維基都好有誠意，我嗰時其實仲有一年先完約，但係佢都肯等我。」

咁李鴻杰（杰哥）會唔會再打重算返TVB呢？他說：「其實當時HKTV冇做嘅時候，都有人接觸過我。都唔排除會返去嘅，因為我同製作部關係都好好，大家都咁多年同事。宜家仔又大個，其實兩公婆生活使費都唔多嘅。人就係咁樣，人到無求當自福。你話我冇錢開飯，返去𠼮無綫呢，就賤過泥，留返俾佢搵我啦，我諗邊份工都一樣㗎啦。如果我返去敲門就唔值錢，係咪？如果宜家有啲監製要用我嘅時候，我咪考慮囉。」其實近年杰哥在中國內地發展亦相當不錯，除不時有商演接洽外，還會拍攝網路大電影。杰哥：「時間就冇咁長，有時都係上去1個星期左右。（好唔好搵？）都OK啦，上去拍3日搵嘅錢，都夠兩公婆普通使2個幾月。」唔知遲下仲有冇機會喺電視上見到李鴻杰佢呢？