綠葉王鬼塚係傳奇設計師 造衫造到九龍城有成棟樓？
拍過五十多套經典電影的鬼塚，幾乎套套戲都係做衣衫襤褸的爛仔，齋睇戲服好難話佢有Fashion Sense，但原名伍健忠的他除了演員這個身份之外，其實更是一個時裝設計師，不但私底下著得潮爆勁有型，其主理的時裝甚至是不少女性的Must Item，絕對是叱吒風雲。當記者打算找他電話訪問，講講加盟無綫以及一些江湖傳聞時，他便立即勁熱情請記者影相兼面談，更在記者面前連飲幾杯啤酒，一個字講哂：豪邁！
TVB仲簽咗呢班綠葉王：
鬼塚的經歷可說是一個傳奇，11歲時在洋服店做學徒的他，就曾經做過車行等各行各業，但次次都被炒收場，到1985年才開了第一間自家品牌「鬼塚」：「喺旺角家樂商場開，之後又搬去柯士甸路，再衝出香港去澳門、北京、上海等地開分店。」
到2003年因痛風症而無奈結束生意的他，在2015年便開始重操故業做設計，整日製牛仔褲：「之前有個年紀有返咁上下嘅女人喺街截住我，話畀我知佢有條我整嘅裙爛咗都唔捨得掉，問我有冇可能整條新嘅畀佢，我話唔得喇，我退咗休唔整裙喇。」
作為一個傳奇人物就一定有好多江湖傳聞，當中就包括有人指鬼塚在九龍城伯爵街有一棟物業，他聞此即連聲否認：「唔係！梗係唔係啦！（又有個故仔話你揸波士返電視城拍劇喎，然後畀人抄牌，硬食咗張牛肉乾，搞到成日人工冇咗。）其實我揸返工啲油都唔止啦，一條大直路都冇咗成舊水啦，架車咁大食。」
簽TVB總有原因：
64歲型伯鬼塚簽TVB打發時間 拍過五十套戲：有得演出已經開心
傳聞當然不止一單兩單，為香港引入不少大牌子的他，就被指當年有份所有型佬都趨之若鶩的神級電單車品牌Harley-Davidson。不過，他受訪時便答謂：「唔係我引入呀，我鍾意揸哈利啫。（引入過咩？）以前嘅嘢唔講咁多啦，雖然都好開心，但我哋睇明天架嘛，不過好多日本牌子都真係我做嘅，但退休之後我都係玩多過做。」
問有否諗過開戲畀自己？他笑謂：「梗係唔會啦！因為嚴格嚟講我唔係做呢行，不熟不做，做時裝我就贏梗嘅，投資其他嘢就蝕梗嘅。我開過酒吧架，但係蝕到X街，因為自己飲哂啲酒，朋友嚟買一打我又送四打。」