【開心速遞】許家傑三歲哮喘發作母親急送院 嘆工作太忙少陪媽咪
一眾《愛·回家之開心速遞》的成員於昨日母親節的日子一起出席活動，現場除了一片歡愉之外，大家亦有大談自己如何跟母親慶祝這個節日。不過其中一位成員就表示自己因為工作關係，所以已經連續兩次節日，包括媽咪的生日，都未能夠陪在她的身邊，這個人就是「送水輝」許家傑。
許家傑難道是位不孝子？當然不是，始終藝人的工作時間並無定時，他的媽咪也會理解。在接受《香港01》訪問時，他說：「我真係好對唔住我阿媽其實，上個月係我阿媽生日，到今個月母親節我又要喺工作中渡過，兩日都夠佢唔到，所以喺度都真係想同佢講聲對唔住媽咪。不過佢好明白，因為我哋係一齊住，我每朝都會爭取時間同佢食早餐，同埋屋企最近壞咗個抽油煙機，我會買返個送俾佢。我由細到大都同阿媽住，尤其是我係孻仔，對上仲有個阿哥，所以阿媽係好照顧我，令到我可以喺一個好好嘅環境去成長。」
其實許家傑跟媽咪有很深厚的感情，而且年幼時更有很多深刻的回憶，他指出：「我細個有啲回憶係我得同佢明白，因為我細個唔係有痴脷根，但係我講嘢係講唔正嘅，係無人知我講咩，唯獨我阿媽聽得明。之後我有去讀語言治療嗰啲課程，佢話我係口部筋肉唔發達，咬字唔清晰，所以我細個嘅時候，媽咪個個星期都要去醫呢個病，都去咗一年時間。」想不到今時今日口齒伶俐的他，原來兒時竟然無人聽得明佢講乜。
【開心速遞】出道八年靠送水輝上位 許家傑：最緊要係多謝林淑敏
除了這件事，原來許家傑年幼的時間重經歷哮喘，全靠媽咪及時發現，不然後果真是可大可小，他表示：「細個嘅經歷已經好模糊，好多都係其他人話返俾我聽，你知唔知媽咪以前為咗你幾辛苦呀，呢啲我係完全唔知。以前我三、四歲嗰陣，哮喘，夜晚落大雨，係我阿媽漏夜帶我去急症室，呢啲全部係我未懂性嘅時候發生，都係人哋話返我知。仲有一樣嘢我要好多謝我媽咪，我細個係好唔乖，試過細個自己踩單出衝落池塘，又會撩事鬥非。我記得有一次我扭計要買玩具，佢叫我唔好再嘈，再嘈就會打我，咁我緊係繼續嘈喇，之後佢就一巴打落嚟，喺好多人面前。突然間我嗰吓好驚，之後我以後就好乖，我永遠都記得呢一吓，我真係好多謝佢。」