【開心速遞】出道八年靠送水輝上位 許家傑：最緊要係多謝林淑敏
講到《愛·回家之開心速遞》這個星期最火爆的角色，一定是由許家傑(Jack)飾演的送水輝，跟林淑敏飾演的大小姐重現《我的少女時代》青春的一幕，看得令人熱血沸騰，更有人說許家傑真的有點像《我的少女時代》入面的王大陸。其實許家傑入行8年，演過的角色有很多，但要數到最為觀眾留下深刻印象，相信除了送水輝亦無出其右。
而Jack亦都坦承，送水輝這個角色是把他的演藝事業推上另一個層次，在接受《香港01》訪問時，他說：「做完送水輝真係會多人認識我，送水輝可能呢個角色本身個設定好得意，永遠都係著西裝但係只係低級職員，又永遠都jel行個頭。咁同我以前啲角色好大分別，我以前永遠都係爛撻撻，或者比較古惑仔嘅人，變咗送水輝就會被人覺得原來我都可以斯文白淨，將另一面嘅許家傑俾人睇。」
除了被更多人認識之外，連收入也順帶提升，事關廣告商也開始向送水輝埋手，但Jack卻要感激一個人，他表示：「我之前做嘅多數都係一啲反派或者江湖人士，對於廣告商係會卻步。送水輝係會令我喺廣告或者其他收入上係多咗，呢個係事實，不過最緊要係多謝林淑敏大小姐，好多時個job其實係佢，但佢會推薦埋我一齊去做，久而久之會變咗情侶檔出現。大小姐因為已經好多人識佢，到送水輝出現，一啲關於情侶檔嘅製作或者節目就會搵我哋，所謂嘅『人氣CP』，呢個真係好多謝淑敏喇。」
除了大小姐之外，其實幕後的人員也功不可沒，他說多得監製容許他拍《愛·回家之開心速遞》之餘還可以接其他劇，因為正常是拍一套劇就一套劇。他還說：「仲有要多謝呢套劇嘅監製、導演同編審，尤其是係編審落咗好多劇本上嘅力，你見到20幾分鐘一集嘅處境劇，其實佢哋落咗好多功夫去豐富呢套劇，一定係居功至偉。」
對於自己近來在《愛·回家之開心速遞》和《果欄中的江湖大嫂》都有相當的戲份，接著的《棟仁的時光》更是飾演反派一號，重頭劇《兄弟》也是重要角色，是否正在被TVB力捧呢？他說：「我又無呢個感覺，我覺得好多時呢啲角色，係以前有搵我嘅監製繼續搵我，呢樣嘢我好開心，原來自己以前一啲唔起眼嘅角色佢哋會留到意，知我好想喺行呢發展，好想做戲。佢哋會一次又一次咁俾多啲機會我，例如《兄弟》嘅監製係以前《飛虎》嘅監製，其實《飛虎》1同2我都有參與，佢一路都會繼續搵我，我真係好感謝佢。另外嚟緊會拍《翻轉貴利王》，係材叔梁材遠先生拍嘅，佢亦都係《果欄》嘅監製，佢每次俾我嘅角色亦都係愈來愈重，係我同佢之間建立咗嘅信任。」一個演員努力是會得到回報的，許家傑便是其中一個好例子。