【母親節】陳家樂細個要嫲嫲孭返學　大個親自下廚煮飯冧媽咪

陳家樂近年在演藝圈界的發展愈來愈好，影視雙棲，工作也愈來愈忙，不過無論幾忙都好，他一有時間都會盡量陪伴家人。來到一年一度的母親節，家樂亦會同屋企人一齊食飯慶祝，以表他對媽咪和嫲嫲的愛，而他女朋友余香凝都應該會一起。提到他與媽咪和嫲嫲之間有甚麼難忘事，家樂說：「我最記得讀幼稚園時，嫲嫲日日都孭我返學校，因為我朝朝都唔願起身，成日話唔想郁，嫲嫲就會由屋企孭到我學校門口前面放低我，直到有一日畀老師發現，先至唔再畀我咁樣返學。」

而他與媽咪最難忘的經歷是讀小學時，有次踩單車受傷：「媽媽見到我受傷，即刻抱起我跑去屋企附近嘅急症室，跑到喘晒氣流晒汗，好擔心我，呢一幕我永遠都唔會忘記。」除了買禮物送畀媽咪，他也會親自下廚煮一日飯畀媽咪食：「以前我會煮啲好簡單嘅嘢例如煎蛋同煎午餐肉，基本上係媽咪督促住我煮，依家已經識煮蕃茄炒蛋同煎牛排。」

相關文章

至於小時候可有被媽咪打過，家樂表示：「媽咪無乜打我，通常係爸爸打我，媽咪就喺旁邊叫爸爸唔好打，其實我細個時並唔算曳，都好少畀爸爸打。媽咪話我好嗲，成日「媽咪、媽咪」咁叫到佢個心都融晒。」他謂希望將來可以送上10卡鑽石給媽咪：「呢樣嘢我爭咗我媽咪好耐，細個時應承過會送粒10卡嘅鑽石畀佢，但係我仲未有能力買，佢每年都會哦我，所以我會買份細啲嘢送畀佢先。」