【性敢中環】連詩雅短裙眼鏡look似「日本AV」：係代表讚美

連詩雅（Shiga）早前就在Instagram上載了一張短裙眼鏡娘的照片大派福利，戴著眼鏡坐在辦公室專心工作的樣子真是迷死不少人。不過這只是HMVOD的新網劇《性敢中環》的花絮照，更有網友留言說「睇到有反應」、「似日本AV」咁話。

今日（5月3日）《性敢中環》一班劇組在中環碼頭舉行開鏡禮，Shiga穿上淺藍色西裝吸引不少「龍友」圍觀影相。連詩雅接受《香港01》訪問説：「我又唔係好覺得（似AV），戴咗眼鏡嘅女仔你點講都得㗎啦。不過我覺得啲人有咁嘅遐想嘅話，可能係代表一種讚美啩，起碼唔會覺得我好悶。純粹係因為想返工同放工分別大啲，咁帶返副眼鏡都係professional少少㗎嘛。」

談到Shiga在劇中的角色，她就形容角色是一個在愛情上比較害羞的女生。「佢暗戀咗師兄（孫耀威飾）好多年，但係一直都唔敢表白，所以我、孫耀威同雨僑就有個三角關係。」Shiga更形容劇中心理醫生的她與現實中也是「慢熱」的人。

劇情方面，Shiga就形容《性敢中環》是偏向女性觀看的劇集。「套劇大致上係講時尚女性、友誼、點樣敢作敢為，所以我覺得唔似《喜愛夜蒲》，反而似《Sex and the City》多啲。」問到Shiga會否在劇中有大膽演出，她說：「我諗最激嘅係，講我最後會遇到一個比我細嘅男仔，我就會有一幕主動少少，去引導佢對我有幻想。（挑逗？）少少啦，我會『壁咚』佢，但係就唔好激吻或者激動場面。」嘩，俾Shiga「壁咚」喎，真係諗起都開心。