姜麗文做TVB「親生女」半年即拍重頭劇：三歲已經想入行

姜麗文（Leslie）今日出席TVB新劇拜神儀式，去年跟TVB簽下藝員經理人合約（俗稱：親生仔女合約）的Leslie，今次當上「親生女」之後第一次拍劇，於劇中飾演黃智雯好友，以及與吳業坤（坤哥）有感情線。姜麗文接受《香港01》訪問時説：「我基本上係喺TVB長大，細個每次暑假都會返嚟探阿爸。」

姜麗文：「細個入廠其實係嚟玩，所以第一次入廠拍劇嘅時候發覺自己唔同咗身份，係一個演員，心諗：Oh my gosh！所以其實有少少壓力、少少驚。但係覺得好有屋企嘅感覺，聞到嗰啲油漆同木味，就好有童年嘅味道，好奇怪。」

姜麗文自言對於自己簽約數月就得到好角色而開心：「廣東話對白就有啲壓力，自己喺屋企會做好多功課。遇到唔識嘅就即刻打俾阿爸，好彩阿爸依家啱啱係亞洲拍緊嘢。」姜麗文笑言自己十分「巴閉」，因為自己的演技老師就是「秦老師」。「我會問佢『呢個語氣你覺得啱唔啱呢？』或者『你覺得佢而家係諗緊咩呢？』，然後我就會FaceTime做返一次俾佢睇。」

初次接觸無綫劇集，姜麗文表示雖然辛苦，但毫不介意：「我恨咗咁耐，忙就忙啦，呢個時間表絕對冇問題。我三歲開始已經想入行啦。（之前冇機會入TVB？）之前一路都忙做歌手嘛。」