【專訪】劉嘉玲自30歲開始每日做運動　要靚一定要付出代價

一個專業演員為了一個演出，一齣舞台劇，到底可以去到幾盡？影后劉嘉玲就是一個「台上一分鐘，台下十年功」的表表者。「我自30歲開始每日做運動，到依家我都仍然冇放棄過。」劉嘉玲說。
攝影：陳順禎
化妝：+0
髮型：Ken Hui @ii Alchemy
服裝：Rockins UK
場地：英皇駿景酒店

劉嘉玲將於今年7月聯同秦沛及謝君豪主演由毛俊輝執導的舞台劇《奪命証人》。要數嘉玲姐演過的電影多不勝數，雖然舞台劇方面寥寥可數，但舞台劇的魔力卻讓她非常著迷。她只曾演過3次，最近一次已經是2014至2015年期間公演的《杜老誌》，當年《杜老誌》反應熱烈，而且更為她贏得「最佳舞台劇女主角大獎」。

「其實未必每一個角色都會與自己性格相似，好多角色都需要用自身專業技術去完成。可能大家會覺得今次我嘅角色係一位聰明，有心計嘅人。但其實呢啲只係表面，佢都有柔弱嘅一面。其實每個人或角色都有弱點，要將人性呈現出來反而係舞台劇最有趣嘅地方。」嘉玲姐說。

嘉玲姐一向抱持專業態度做好每件事，雖然她現時已在業界得到不少成就，但她的生活習慣絕對沒有因此而改變，「台上一分鐘，台下十年功」絕對是她成功的引証：「要做一次舞台劇我嘅準備功夫要做好耐，例如體能、身型、健康等，全部都息息相關。我自30歲開始每日做運動，到依家我都仍然冇放棄過。因為作為一個專業嘅演員對自己一定要有嚴格嘅規定。」

為了事業，嘉玲姐除了要保持良好狀態外，她坦言說話用字也需要與時並進，因為同一句對白在不同年代出現，用字上也有不同：「我唔可以與時代脫節，因為當你被時代淘汰，你講嘢用詞又會舊，自然喺對白表達上亦會舊。所以我一路都喜歡向年青人傾計，學習，要知道佢哋嘅語言。嚟到呢個年紀，我身邊嘅朋友都係鍾意打牌，shopping（購物），但我唔同。我想學多啲嘢，我唔會用『捱』去形容我嘅學習，因為呢個就係我人生樂趣。」

她續說：「我覺得成功嘅人係要有一顆『童心』，因為有童真嘅人解決問題時會用最簡單嘅方式，有時處事太複雜可能會損人不利己，所以我做人好簡單，而且我覺得自己係一個好勇敢嘅人，有好多挑戰我都會願意去嘗試。尤其是我這個年紀，要趁自己有心有力周圍見識，感受生活，因為呢啲生活細節都會對人生及工作好有幫助。」