【專訪】鄭欣宜坦言做歌手8年一直缺自信：冇諗過會有人聽我唱歌
要成為一個歌手，從來都希望有一個辨認度高的樣貌，備受認同的代表作。但今次接受專訪的女歌手雖然入行已受不少人關注，但原因並不是來自她的歌唱作品，而是來自她的出身。初初入行做歌手時更一度認為「唔會有年輕人鍾意」，如今她終於憑著自己的努力得到樂迷認同，2018年更初登紅館，她就是——鄭欣宜。
攝影：黃國立
髮型：Milk Chan@Xenter
化妝：Samuel @江中平化妝室
造型：Constance Lee @ConStyle
場地：HMV
歌手鄭欣宜（Joyce）2010年正式成為歌手，至今已經第8個年頭，回想她入行至今，Joyce一直有推出音樂作品，而且又不乏幕前機會，但她的出身，或是她的身型，一直成為「被放大」的話題。到2016年她終於有一首迴響甚大的代表作《女神》，她的努力終於得到大家認同，同年更在樂壇頒獎典禮得到亮麗成績。正當旁人認為她過去的成績自然會為她的自信心建立基石之際，Joyce坦言她也有失去自信的時候。
她表示：「《女神》呢首歌成績好好，而且有好大嘅迴響，但我覺得最重要嘅信息係教我做人要謙虛，有好多嘢唔係必然。大家可能認為一個歌手有一首代表作之後，所有嘢自然會平步青雲，其實係相反，因為之後做嘅所以無論係歌或者工作都會更加難。我喺《女神》呢首歌同不斷同大家講『你是女神』係想大家有自信，只要有自信人人都可以喺女神。雖然我不斷向大家傳遞呢個信息，但我忘記要相信自己。我有時會質疑自己能力，我會諗呢首歌點解咁又力量，其實可能全因藍奕邦嘅神曲，黃偉文嘅神詞，仲有監製何山，而唔係自己。」
平心而論，欣宜的歌手歷程相比同期出道的歌手幸福得多，因為早在她正式成為歌手時已有不少人認識，但同時她自信心卻與她的名氣不成正比。Joyce憶起2010年她參加校園活動，當她唱著《有故事的人》時，一班學生由她出場時氣氛平淡，到她唱罷後全場興奮喊著她的名字，對於初次在公開活動得到別人認同，她在現場感動落淚，當她憶述時不禁眼有淚光：「可能對好多人嚟講簡單一個校園活動唱兩首歌唔算喺啲乜，但我真係冇諗過有人會唔介意見到我、會聽我唱歌、會唔介意喺台下跟住我一齊唱，因為我細細已經覺得唔會有年輕人會鍾意我，所以我喺台上忍唔住喊。由當時開始我無論參與任何類型嘅演出，我都會好珍惜，好希望做一個好好嘅演出畀大家。」
提到紅館騷即將舉行，Joyce坦言要節制自己的運動量，因為她坦言自己是一位「緊張大師」，由於過量的操練，令她的腳傷有所負擔。除此之外，為了演唱會，她最近推出了新歌《黑彩虹》，希望新歌能為身邊人及自己，在逆景時增添色彩：「《黑彩虹》由 馮穎琪作曲、黃偉文填詞、謝國維編曲監製。呢首歌會比較dark一啲。我初初收到呢首歌嘅詞真係覺得好感動，好漂亮。其中副歌『黑彩虹仍然亮著某片最暗天空』我睇到呢句，我腦海馬上浮現出一道鋪滿塵嘅彩虹，雖然佢冇哂光彩，但依然可以透過塵與塵之間嘅空隙照亮某小部分人嘅天空，我覺得呢首詞寫出我做歌手嘅心聲，而且當中傳遞嘅信息比《女神》更加成熟。即使我被其他人攻擊致傷痕累累，我都會與欣賞我嘅人一齊努力，衝破難關。」