【專訪】陳輝陽《K歌之王》全靠FF煉成 你會喊全因首歌夠商業？
神級作曲人陳輝陽，他的音樂作品一向是以「故事性」見稱。自小已喜歡古典音樂的他，喜愛把古典樂元素融入流行曲中，而且他曾為廣東樂壇創作過不少膾炙人口金曲，如陳奕迅的《Shall We Talk》、容祖兒的《痛愛》、楊千嬅的《少女的祈禱》、鄭秀文的《交換溫柔》、《如何掉眼淚》、盧巧音的《垃圾》、彭羚與黃耀明的《漩渦》、張學友和林憶蓮合唱的《日與夜》等多不勝數。他的音樂陪伴了不少80後成長，但當中歌曲背後的故事大家又了解多少？
攝影：葉家豪
「誰人又相信一世一生這膚淺對白／來吧送給你叫幾百萬人流淚過的歌...」 相信這首陳奕迅2000年推出的時代之作，陪過不少80後成長，不論是副歌部分的歌詞，還是聽到第一句「我唱得不夠動人你別皺眉／我願意和你約定至死...」腦海中自然會浮現了《K歌之王》的畫面。這首在編曲中結合了多首流行曲，在國語版歌詞更埋藏了65首歌曲的名字的神曲，究竟當初「夕陽組合」（陳輝陽與林夕）為何要花這種未必會人人能留意的心思在一首《K歌之王》之中？
陳輝陽坦承《K歌之王》源自一句「商業化」而產生，他憶述：「《K歌之王》的確將33首歌嘅元素放入去。我記得當年陳奕迅由華星唱片轉會到英皇娛樂，當時我同佢剛剛合作完《美麗有罪》、《黑夜不再來》，然後Eason為滿足新公司要求，希望我做一首比以往更商業化嘅歌曲，於是我就問自己，『到底點樣先可以做到一首更K嘅歌呢？』跟住就跟填詞人林夕商量創作一首包含好多歌名嘅歌。呢個想法源自一個虛構故事，故事入面有一位男仔好喜歡唱K，佢當時好喜歡一個女仔，佢認為只要佢唱盡所有出名嘅K歌，呢位心儀嘅女仔自然會愛上自己。不過不幸地呢位女仔只認為個男仔只係一個『K歌之王』，最後亦都冇愛上佢。除此之外，我仲有另一個想法，既然大家都公認Eason係一個唱得之人，不如寫一首有史以來最難唱嘅歌畀佢唱，所以《K歌之王》除咗好有音樂性之餘，演繹上會好似情感上嘅過山車一樣。」
他續說：「《K歌之王》呢首作品絕對係我一個美好嘅回憶，當時推出之後反應好好，好多人都有試過翻唱，不過可惜到現時為止都冇人可以超越陳奕迅嘅版本，因為呢首歌真係好難唱，唔係人人可以駕馭。我作完呢首歌之後，都曾經收過一啲歌手邀請，佢哋希望我為佢哋作一首《K歌之王》。上年年中，有一隊在內地幾hit嘅內地男子組合搵我寫歌，咁我問佢哋想我寫邊一類型嘅歌，佢哋就要求要一首《K歌之王》。當時諗，《K歌之王》對佢哋嚟講難度太高，所以我就建議另一類型嘅歌曲，不過佢哋最後都冇用到。」
談到另一首時代時代之作《人來人往》同是出自「夕陽組合」，當中歌詞提及「閉起雙眼我最掛念誰／眼睛睜開身邊竟是誰」令不少樂迷產生共鳴，歌曲的靈感並不是源自他的經歷或別人的故事，反而是來自一座「天橋」。 「有晚我喺屋企寫歌，當時由窗口望著外面一座天橋，我就諗起其實人生有唔少過客，有一啲人係唔重要，但事實又未必如此。有一啲人錯過了，但係佢嘅事或會跟住你一世。因為有呢個概念嘅關係，林夕之後就寫出《人來人往》副歌嘅名句『閉起雙眼我最掛念誰， 眼睛睜開身邊竟是誰』」陳輝陽說。