麥明詩主持拍劇愈來愈忙　Facebook靠母幫忙鞏固粉絲關係

麥明詩早前去陽光與海灘期間，不時於個人社交網絡上載泳照與揈水髮片段，除了吸引粉絲、網民單方面留意，一向形象親民的麥明詩更與網友互動，一教一學研究揈水髮技巧。不過，回港後的她除了繼續主持《後生仔傾吓偈》，更準備埋班拍劇，於網上與粉絲互動交流的情況自然會減少，相信粉絲雖體諒，但亦會失望。

幸好，麥明詩沒空，但她媽媽卻經常出沒於女兒的Facebook，代女回覆及交流。
「係呀，因為佢近年先啱啱開始玩facebook，所以佢覺得好新奇，同時又好active囉，佢都幾享受呢個遊戲架，因為佢成日覺得我無時間覆，咁佢就想同啲人有直接互動，可以鞏固下關係。我而家就真係工作囉，都會keep住更新嘅，但就唔會一次過share好多咁囉。」

麥明詩個人社交網絡除了有媽媽加持，幫手建立、鞏固粉絲關係，其實她本人分享出來的帖文都很有意思，再加上相當言簡意賅、畫龍點睛的形容與Captions，未知有心還是無意，但總會讓有心人找到「笑點」。

「我覺得做藝人幽默感好緊要嘅，但盡量幽默得嚟又唔好挖苦到人，呢個平衡都一定要攞到囉，呢樣嘢就學緊啦，尤其是自己係後輩啦，有時唔敢亂笑亂講。其實都係香港人關心嘅話題，用一個幽默啲嘅方式去睇囉。我覺得尤其我哋藝人有時講太多好正經、好正面咁講呢，觀眾又未必咁接受，因為其實大家都壓力大，都想輕輕鬆鬆一下嘅，但有時輕鬆得嚟又有啲意思呢就係個最好嘅平衡。」

麥明詩工作愈來愈忙，連facebook都要媽媽協助回覆，但不代表工作以外的瑣事都交由他人代理，其實她為人十分獨立，獨立得連傢俱都是自己選購，再自己運送。一個女仔抬張凳回家，在香港相當鮮見。

「其實我就習慣嘅，因為我平時日頭唔使拍嘢嗰時呢，家人或者朋友都返工吖嘛，自己又有揸車，咁我之前喺外國讀書時都好獨立嘅，好多嘢都係要自己處理囉，我覺得唔好依賴咗其他人，咁就會令自己能力愈來愈弱。」聽她說畢，有種「不愧是十優」的專敬感。
 

一個人買傢俱，是搬出來自住嗎？她說：「其實係有呢個諗法同方向嘅，但係都仲睇緊，因為要考慮各方面，好似地區咁，因為都真係想近公司囉，同埋財政方面睇下支唔支持到咁樣。」又怎會支持不來呢？工作更多，知名度更高，因此她謙虛地指自己要繼續努力，同時為更多人認識她的性格、記得她的樣子而高興，畢竟「以前啲人可能都好片面咁了解我係港姐或者讀書嗰啲」。